Roniştişo yewin yê Doza Pirsûsî ke netîceyê hêrişê DAIŞîyêk de 33 endamê Federasyonê Komeleyê Ciwananê Sosyalîstî (SGDF) merdbî û bi seyan kesî zî birîndar bîbî, ame dîyayîş.
Avûkatanê doze ra Gulhan Kaya û Ozlem Gumuştaşe qisey kerdî û qala roniştişê doze kerdî.
Avûkate Kayaye va ‘Amed ra heta Pirsûs û Pirsûs û Anqara tehqîqatêko baş nêame meşnayîş û cok ra qetlîyamî pêsero virazîyayî’ û wina domnaye: “Qetlîyamê Anqara ra dima Serekwezîrê ê wextî Ahmet Davutogluyî vatbî; ma bi hawayo baş tehqîqat meşnenî. Ma do qatilan bivînî. Biewnênê, ma bombekarê Pirsûsî teslîmê mehkeme kerd.”
Avûkate Kayaye wina va: “Eynî nizdîbîyayîş, na doze de zî dewam keno. Seba roniştişî vatbî do saet 09.05 de dest pêbikero, la saet 15.30 de dest pêkerd. Keyeyî bi saetan vindetî û cayo ke keyeyî tede bivinderî zî çinêbî. No cezakerdişê mexduran o. Çi heyf ke mehkeme haya cîddîyetê doze de nîya. Reyna seba ke bêro mehkeme veng nêda faîl Yakup Şahînî. Hîna prosesêko zehmetin paweyê ma yo. Ma nêyî dozanê Hrant Dînk, Roboskê û Sêwazî ra zanî. Heta ke qatilî bêrî mehkemekerdiş, têkoşînê ma do bidomîyo.”
Têkoşînê ma do bidomîyo
Avûkate Gumuştaşte zî va ‘roniştişo yewin de dîyar bî ke mehkeme do bi fikrê sîyasî hereket bikera’ û wina domnaye: “Mehkeme waştişê mudaxîlîya ma red kerde. Qerar yeno manaya rayapêroyî ra nimitişê qetlîyamî. Ma nika mehkemeya ke waştişanê ma qebul nêkena û bi hawayo sîyasî nizdîyê ma bena reyde rî bi rî yî. Ma do têkoşînê xo yê edaletî hem mehkeme de û hem zî ziqaqan de bidomnî. Têkoşînê ma do tena seba endamanê DAIŞî nê, seba kesê ke nê qetlîyamî ver çimê xo girewtî zî dewam bikero.”
DÎHABER/RIHA