Ersîn Okuro ke verê cû bi îşkenceyo ke Zîndanê Pozanti de dîbî amebî rojeve, aşmêk verê newe ra tewqîf bî û erzîya Zîndanê Tarsusî. Ame musayîş ke Okur zîndan de raştê îşkenceyê gardîyanan ameyo.
Babete ser o avûkatê Okurî Mehmet Altuntaşî qisey kerd. Altuntaşî va ‘roja ke muwekkîlê mi û 3 kesê bînî erşawîyenî zîndan, sehnayîşê rûtî înan ser de yeno ferzkerdiş’ û wina dewam kerd: “Seba ke qebul nêkenî, raştê hêrişê personelan yenî û yenî derbkerdiş. Netîceyê derbkerdişî de 14 rojî cil de manenî. No proses de qet tedawîya înan nîna kerdiş û 14 rojî ra dima vejîyenî revîr. Herçiqas ke Okur cayê derban nîşanê doktorî dano, doktor herinda ke rapor bido ci, dermanêkî dano Okurî.”
Altuntaşî va ‘muwekîlê mi mexdurê Zîndanê Domanan yê Pozanti yo’ û wina dewam kerd: “Seba ke o zîndan amebî padayîş, muwekîlê mi tehlîye bîbî. Gardîyanî Okurî ra pers kenî, ‘ti verê cû zîndan de mendî an nê?’Okur zî vano ‘ez Zîndanê Pozanti de menda’. Gardîyanî ci ra vanî ‘madem ti ewja de nêbî merdim, ma do to tîya de bikerî merdim’û bi şekmat û paşkulan danî ey ro. Hêrişî ver 4 didanê Denîz Ozdemîr, Ridvan û yê Ramazanî şikîyenî. Zîndan de kerdişê kêfî estî. Heto bîn ra gardîyanî şonî koguşan û hepsîyan ra vanî ‘ganî şima îtaatê ma bikerî, ma se vajî ganî wina bibo’. Ma derheqê personelanê îşkencekaran de gerre kerd.”
MA/MÊRSÎN