Yewîya Pawitişê Şarî (YPG) derheqê hêrişê artêşa tirkî yê demê peyênan de îzehetêk daye û bi îzehetê xo eynî wextî de bîlançoya hêrişan zî aşkere kerde. 

YPGyî îzehetê xo de bale anto hêrişê artêşa tirkî ser û wina vato: “Artêşa tirk 25ê Nîsane de saet 2.00ê şewe de teyarayê şerî ke aydê dewleta tirkî bîy, hêrişê Fermandarîya Pêroyî ya YPGyî ke Qereçoxî de bîy ser de bombe varnayî û hêrişan de Merkezê Çapemenîye ya YPGyî, dezgehê ke girêdayeyê fermandarî yî, bînaya Radyoya Rojava Denge û zaf cayê ke aydê YPGyî bîy, bîyî hedefê hêrişan. Netîceyê hêrişê artêşa tirkî de 20 YPGyî merdî û 18 şerwanî zî birîndar bîyî.”

Hêzê ma derbeyanê girdî dayî piro

YPGyî dewamê îzehetê xo de vato ‘Nê hêrişan ra dima artêşa tirk hêrişê heme hêzê ma yê ke sînorê Rojawanî ser de bîy, kerde’ û îzehet wina dewam kerdo: “Artêşa tirk qezaya Cindirêsî ra heta Dirbesîyê zaf nuqtayan de hêrişê hêzanê ma kerda. Hêzê ma zî bi hawayo wişk cewab dayî hêrişanê dewleta tirk û derbeyê girdî dîyayî artêşa tirkî ro.” 

Ma do bêcewab nêverdî

YPGyî îzehetê xo de dîyar kerdo ‘her çiqas ke heta nika ma cewab nêdayo hêrişanê dewleta tirkî û ma hewl dayo ke dewleta tirkî reyde têkilîyê baş bimeşnî zî, hêrişê dewleta tirk bi ti hawayî nêvindetî. Labelê nê hêrişanê peyênan ra dima ma do êdî vera hêrişan de bêveng nêmanî. Ma do çarçeweya qanûnanê mîyanneteweyîyan de cewab bidî hêrişan. Nika ra pey ma do hêrişê dewleta tirkî ti hawayî bêcewab nêverdî.” 


Cewabêko wişk ame dayîş

Goreyê îzehetê YPGyî bîlançoya hêrişan û derbê ke dîyayî artêşa tirkî zî aşkere kerdo. Bîlanço wina ya:

-Têyarayê artêşa tirkî mabênê 25 û 27ê Nîsane de sînorê Rojawanî ser de 22 reyî firayî û hetê ci de teyarayê bêmerdimî zî herême ser de firayî û bi sîlehanê giranan hêrişê herême kerdî.

-Artêşa tirk 26ê Nîsane 2017 de pirdê Heşarkê, Ezaz, Kefer Xaşer, Til Malid, Ablê Şiltehtê û dewa Sosyênî de hêrişê cayê ke aydê hêzanê ma bîy, kerda. 

-Artêşa tirk ya dagîrker hêrişê dewê Eradê, Çetelê û Şerikê ke girêdayeyê Dirbesîyê yî, kerda.

-27ê Nîsane 2017 de zî hêrişê herêma ke mabênê Girê Sipî û Kobanî de, dewê Til Findir û Sûsikî kerda. 

-Artêşa tirk hêrişê herêma Serêkanîye de dewa Elokî û dormeyê ci kerda.

-Artêşa tirk dewê Qara Baba, Haşerkê, Meydan Ekbes, Dêrbelut, Şiltehtê de û reyna dewê Maranez, Belûnê, Eyn Deqnê û Hemamî de bi obus, hawan, tanq û sewbîna sîlehan hêrişê hêzanê ma kerda.

-28ê Nîsane de artêşa tirk saetanê şewe de bi topanê obusan hêrişê dewanê Maranez, Belûnê, Eyn Deqnê û Vîla Qadî kerda.

-Reyna wextê hêrişan de teyarayê bêmerdimî herême ser de seba kifşkerdişî firayî.

-Artêşa tirk 28ê Nîsane de saet 4.30 de bi hewan û tanqan hêrişê herêma Xerezî û Girê Hemdunê ke dormeyê Dirbesîyê û Amudê de yî, kerda.

Hêzê ma nê herêman de bi hawayo wişk cewab dayî hêrişanê dewleta tirkî û mabênê hêzanê ma û artêşa tirkî de şerêko giran qewimîya. Netîceyê hêrişî de 3 tanqî, 2 panzerî û 1 wesayîtê radarî û 2 meterîsî ameyî îmhakerdiş. Netîceyê cewab dayîşê hêzanê ma de 1 leşker merdo û 3 leşkerî zî birîndar bîyî.


  ANF/DÊRIK