Rojnameyê Ozgurlukçu Demokrasî ke 23ê tebaxa 2016î de dest bi weşanî kerd, 1 serra xo temam kerd. Rojname par teşebusê derbe ra dima wextê OHALî de dest bi weşanî kerd, heta nika keyepelê rojnameyî yê înternetî 42 reyan ame padayîş û bi desan vilakarê rojnameyî ameyî tepiştiş û tewqîf bîyî. Edîtoranê Rojnameyî ra Rojda Korkmaze derheqê weşanê rojnameyî de qisey kerde û vînayîşê xo arde ziwan.
Korkmaze va ‘Tirkîya de bi îqtîdarê AKPyî polîtîkayê zext û tedayan de kûrbîyayîş esto û wina dewam kerde: “Nê polîtîkayê zext û çinîkerdişî 15ê Temmuze 2016î ra dima sewbîna şekil girewtî. Tirkîya de heme muxalîfî nê polîtîkayan ra para xo girewtî. AKPyî 15ê Temmuze ra dima hewl da derbe temam bikero û heme muxalîfan girewt hedefê xo. Polîtîkayê çinîkerdiş û teslîmgirewtişî serranê 90î ra nata dewam kenî, serra 2000î de no proses bi tewqîfkerdişan dewam kerd. Wexto ke nê polîtîkayan ra netîce nêgirewtî, dest bi bêvengkerdişê çapemenîye kerdî. Heme çapemenîya muxalîfe ameye padayîş. Ma zî vera nê hêrişan de dest bi weşanî kerd. Hedefê ma o bî ke ma Kurdistan û Tirkîya de bibîy vengê cinî, karker, kedkar û bindestan. Ma bi no hawa dest bi weşanî kerd.”
Yew serre bi zextan dewam kerd
Korkmaze dewamê qiseykerdişê xo de va ‘wexto ke ma dest bi weşanî kerd, zextî zî zêde bîyî’ û wina domnaye: “Keyepelê ma yê înternetî 42 reyan ame padayîş. Ma hetêk ra hewl da bibî cewabê polîtîkayanê bêvengkerdişî, labelê eynî wext de ma bîyênê hedefê hukmatî zî. Tena ma nê, ajans û dezgeyê çapemenîye yê bînî zî bîyênê hedefê hukmatî. Muxabîr û vilakarê ma ameyî tepiştiş û resayîşê ma yê şarî ame astengkerdiş. Labelê reyna zî ma rayîrê xo resnayîşê şarî dî. Hukmatê AKPyî no het de nêşeno nê polîtîkayan ra netîce bigîro û no het de bêçare maneno. Cok ra demanê peyênan de vera ma de polîtîkayê zext, padayîş û hêrişî bîyî kêfî.”
Ma do bibî vengê cîyayîyayn
Korkmaze qiseykerdişê xo de bale ante zext û hêrişan ser û wina va: “Senî ke çapemenîya azade serranê 90 û 2000î de weşanê xo domnaye, ma zî ewro hewl danî bidomnî. Ma do polîtîkayanê hukmatî deşîfre bikerî û biresnî şarî. Nika vera AKPyî de cepheyêko cîddî yê xoverdayîşî awan bîyo, çapemenîye zî bîya parçeyêko cîddî yê nê xoverdayîşî. Cok ra çapemenîye zî raştê eynî hêrişan yena. Ma do hetê cinî, karker, kedkar û nasnameyanê cîya-cîyayan de ca bigîrî û bibî vengê nê cîyayîyan. Çapemenîya azade ya kurd kultirê xoverdayîşî ya. Cok ra herçiqas zext, padayîş, tepiştiş û tewqîfbîyayîşî estî, ma do îmkanan xelq bikerî û xo biresnî şarê xo. Ganî heme muxabîr û dezgeyê ke raştê zext û tedayan ameyî piştî bidîy yewbînan û hetê yewbînan de ca bigîrî.”
DÎHABER/STENBOL