Verfeka Meclîsê Cinîyan ya HDPyî Dîlan Dîrayet Taşdemîre derheqê xeta têkoşînî ya donemê neweyî yê HDPyî de qisey kerde. Taşdemîre va ‘weçînayîşê 24ê Hezîrane de derbêka girde dîya sîstemê parlamenterîye ro’ û wina domnaye: “Herçiqas ke ti manaya sîstemê parlamenterîye nêameyo verdayene zî, ma do ziqaq û rasteyan de têkoşînê xo bidomnî.” Partîya Demokratîke ya Şaran seba ke xeta polîtîke û têkoşînê donemê newe dîyar bikera, 20ê Temmuze ra nata Wan de kampe de ya. Roja sifteyîne ya kampe de parlamenterê cinîyî yê HDPyî ameyî têhet û derheqê polîtîkayanê cinîye de munaqeşe kerdî. Verfeka Meclîsê Cinîyan ya HDPyî Dîlan Dîrayet Taşdemîre derheqê têkoşînê neweyî yê cinîyanê HDPyîyan de melumatê muhîmî dayî. Taşdemîre dîyar kerde ke weçînayîşê 24ê Hezîrane de derbêka girde dîya sîstemê parlamenterîye ro û wina va: “Têkoşîno ke vera nêyî de bêro dayene, bi mekanan sînordar nîyo. Tirkîya de heme selahîyetî kesêkî de kom bîyî û êdî ti mîsyonê qanûnviraştiş, caardiş û huqûqî nêmendo. Prosesêkê kaos û krîzî yeno cuyayene. Ma cinîyî xora verê cû zî ferqê nêyî de bî.” Taşdemîre qala tehlukeyanê Sîstemê Serekkomarîye û têkoşîno ke vera nê sîstemî de bêro dayene kerd û wina va: “Têkoşînê cinîyan heta nika bedelê zaf girdî dayî. Îqtîdarê AKPyî polîtîkayê xo cinîyan de îqtîdaranê bînan ra cîya yo. Çimkî polîtîkayê ke dişmenîya cinîye kenî, yenî domnayene. Ganî rêxistinê cinîyan vera nê sîstemî de bêrî têhet û pîya têkoşîn bidî.” OHAL bi rejîmo mende Taşdemîre dewamê qiseykerdişê xo de wina va: “Se ra 50ê Tirkîya vera netîceyê weçînayîşê 24ê Hezîrane de xover danî. Ma nika rejîmêko zextkar reyde têrî yî û her ke şono zextî zêde benî. Ewro heqê esasî nêdîyênî bikar ardene. Çimkî îqtîdar bi hawayo baş zano ke o nêşêno estena xo şertê demokratîkan de bidomno. Cok ra her ke şono zext, şîddet û sîyaseto ke heme mekanîzmayan veng vejeno, yeno domnayene.” Ma do têkoşînê xo bidomnî Taşdemîre derheqê munaqeşeyê ke kampe de ameyî kerdene de va ‘ma hemînan ser o analîzî kerdî û ma do têkoşînêko senîn bidomnî de munaqeşeyî kerdî’ û wina qedênaye: “Ma do xetêka senîne xelq bikerî ser o munaqeşeyê ma dewam kerdî. Ma dîyar kerd ke ancax bi têkoşîn no proses bedilîyeno û ma ancax bi xoverdayîşî eşkenî nê sîstemê wedarnî. Herçiqas ke ti manaya sîstemê parlamenterîye nêameyo verdayene zî, heta ke ma Meclîs de bibî, ma do ziqaq, raste, keye û awanîyanê partîye de mîsyonê xo bîyarî ca. Ma no het de qerardar î. Ma seba deşîfrekerdiş û teşhîrkerdişê polîtîkayanê AKPyî, warê Meclîsî muhîm vînenî. Ewro berpirsîyarîya ma ya ke ma vera rejîmê faşîstî de têkoşînê ziqaqî aver bîşêrî esta.”  MA/WAN