Referandûmo ke do Sîstemê Serekî bêro weçînayîş rê tena 13 rojî mendî û her ke referandûm nizdî beno, hetê cîya-cîyayî derheqê referandûmî de fikrê xo aşkere kenî û seba çi do nê tercîh bikerî aşkere kenî. Qezaya Bismilî ya Amedî de şar derheqê referandûmî de qisey kerd û fikrê xo aşkere kerd.
Burhan Zumrut: Seba ke şar raştê qetlîyaman nêro, muzakere reyna dest pêbikero ma vanî nê. No het de ez veng dana şarê ma; seba ke yewna rey mexdurîyet nêro cuyayîş û mergî nêbî, wa vajî nê. Seba ke zîhnîyetê yew millet, yew beyraqe û yew ziwan hakim nêbo, ma dormeyê nêyî de kom bibî.
Ma do vajî 'Nê'
Yasemîn Şeyhmusoglu: Ez do seba ke şarê kurd raştê neheqîyan nêro û azad bicuyo, reyna kayê ke bi serran o ke şarê kurd ser de yenî meşnayîş ez vana nê. Ganî şarê kurd êdî hişyar bibo û hesab biperso. Ma do seba ke kayanê îqtîdarî xira bikerî, ma do vajî nê. Ma do heta peynî pey Rayber û şehîdanê xo de bibî. Ez bitaybetî veng dana dayîke û cinîyanê kurdan; eke cinîye biwaza eşkena heme çî bikera. Ma bi vatişê nê, têkoşîn û ameyoxa xo rê wayîr bivejyî.
Aydin Kortak: Seba ke yewna rey Cizîr, Sûr û Nisêbîn nêro cuyayîş û gonîye bivindero, ma do vajî nê. Parlamenteranê ma tewqîf kerdî û îradeya ma xesp kerdî; cok ra ma do vajî nê. Ma veng danî heme şarê xo ke wa 16ê Nîsane de şêrî sindoqan ser û vajî nê.
Wa wayîr bivejyî
Ekrem Çîçek: Ma sîstemê padîşahî û dest ronîyayîşê îradeya şarî rê vanî nê. Seba ke aştî û demokrasî hakim bibo ma vanî nê. Ma vera tewqîfbîyayîşê sîyasetmedaranê kurdan de veng danî şarî ke wa şêrî sindoqan ser û reaksîyonê xo nîşan bidî. Demê peynî de bi zanayîş vatişê ‘kurdî do boykot bikerî’ yenî vilakerdiş; ganî ti kes goş nêdo nê vatişan û wayîrê rey û sindoqa xo bivejîyo. Nê, Nê, Nê.
Hamdîye Ozdaş: Ez veng dana dayîkê kurd û tirkan, wa dormeyê nê de kom bibî. Êdî bes o ma hende zulm cuyayî. Domanê ma kişîyayî, tewqîf bîyî û keyeyê talan bî û huzir nêmend. Ma ra vanî boykot bikerê, ma do çira boykot bikerî. Ma do 16ê Nîsane de şêrî sindoqan ser û vajî nê.
MELEK YUKSEL / ANF / AMED