ADNAN BÎLEN / MA/QERS
Rasteyê citkarî û pezkarîye de Qers şaristenêko zaf bi muhîm o la belê polîtîkayê îqtîdarî ser o Qers de her ke şî, humara heywanan kewt û girêdayî na rewşe zî hûmara citkaran zî kewt.
Dewijê Eskîqazê Qersî polîtîkayê îqtîdarî ra gerraker ê. Citkar Celal Karakoç vat ke eke na rewş dewam biko do citkarî biqedîyo û wina vat: “Ma dewlete ra gubreyî ke gênê, xo ra zahîrerotox zî eynî fîyat ra roşeno. Dewlete ma rê hetkarî ke dana, encax yew serre vîyareno peynî dana. Çiqas ere bidê, ona erjîyeyîya pere nêmanena. Ma kredîyê xo mecbur demê xo de danê, wa dewlete zî demê xo de pereyê ma bido. Dewlete ma ra şit nêgêna, çimkî fabrîkaya dewlete ewta çin a. Ma zî çi heyfo destê tuccaran kewenê.”
Her ke şono citkarî qedîyeno
Hewna citkar Erdal Karakoç zî dîyar kerd ke çi heyfo ke êdî ê nêçare karê citkarîye ra fek veradê û wina domna: “Ma êdî nêeşkenê heywanan xo miqate bikê, dewe de her kes bankayan ra deyndar o. Xo ra hetkarîya dewlete çin a. Her ke şono ma têk şonê. Eke sanayî û citkarîya dewletêk têk şono se a dewlete zî têk şona. Heme polîtîkayê şaşî ra qewimyenê. Dewlete bi deyndarkerdişî, citkaran girewtê mîyanê destê xo, ma nêeşkenê têbigêrê. Ganî fek nê polîtîkayan ra fek veradîyo.”