Hemşaredarê Bajarê Girdî yê Amedî Adnan Selçûk Mizrakli ke herinda ci de qayûm ame tayînkerdene, bi rayîrê vîdeo konferansî beşdarê panelê Tevgerê Vera Nîjadperestîye û Piştîdayîşê Mabênê Şaran (MRAP) bi. Mizrakliyî roniştişê konseyî selam kerd û dîyar kerd seba ke vejîyayîşê teberê welatî ci rê ameyo qedexekerdene, nêşênayo beşdarê panelî bibo.
Mizrakliyî va ‘ma weçînayîş de bi se ra 63 reyan ameyî weçînayene û ma waşt karê xo bidomnê’ û wina dewam kerd: “Ma waşt şima reyde bê, labelê sîstemê îqtîdarî ke wazeno rejîmo şexsî welatê ma de serdest bikero vejîyayîşê teberî ma rê qedexe kerd. Ma wezîfeyî ra ameyî dûrfînayene, coka ma neçar ê ke dûrî ra beşdarê konferansî bibî.”
Mizrakliyî veng da beşdaranê konferansî û wina va: “Şima beyannameyo ûnîversal ê heqanê merdiman tesdîq kerdo û wazenê vera nê muameleyan de vejê. Ez wazena tîya ra veng bida şima; bêrê, komîsyonêk saz bikerê, şêrê Amed, Mêrdîn û Wan, şarî ra bipersê ke merdimê weçinîtî çira wezîfeyê xo ra ameyî dûrvistene yan zî şarê herême qeraro ke ameyo dayene ra kêfweş ê yan nê? Heyf o ke Tirkîya de heqê bingeyênî yê merdiman yenê binpaykerdene.”
‘Wextê vervejîyayîşî ameyo’
Mizrakliyî hêvîya xo ya seba dinyayêka şerî ra dûre, dinyayêka aştîyane ard ziwan û wina qedêna: “Wext ameyo ke herkes goş bido wijdanê xo û vera nê kerdişan de vindero. Îdarekarê herême nîşanê demokrasîya welatêkî yê. Ma hêvî kenê ke şima do vera zordarîya ke ma rê kenî de bêveng nêmanenê.”
ANF / BRUKSEL