Vera tehdîdanê dewleta Tirkî û Erdoganî de bi hezaran kesî ameyî têhet, Kantonê Hesekê de çalakîya rayîrraşîyayîşî viraştî û protesto kerd. Çalakgêrî heta qerargehê koalîsyonê mîyanneteweyî rayîr ra şîyî.
Serkêşê eşîrê Kurd û Ereban zî tede, temsîlkarê partîyanê sîyasîyan û endamê komelê sîvîlî zî çalakîye de ca girewtî. Wextê çalakîye de vera tehdîdanê dagîrkerîye de siloganî ameyî eştene. Çalakgêran veng da koalîsyonê mîyanneteweyî û waşt ke wa hêzê koalîsyonî reaksîyon nîşanê Tirkîya bidî. Çalakgêran waştişê xo temsîlkaranê koalîsyonî ra va. Çalakgêran tîya de fermandarê leşkerî Mîke reyde pêvînayîş kerd û mektûbêk teslîmê fermandarî kerde.
Serekê Meclîsê Fikrê Hesekê Fewaz El-Zewba ke heyet de ca girewt, va ‘ma aştî û dîyalog wazenî’ û wina dewam kerd: “Ma nêwazenê ke dewleta Tirkî reyde şer bikerî. Ma Herêma Biewle ke Tirkîya goreyê menfîetê xo qala ci kena, red kenî. Ma planê Tirkîya sey planê dagîrkerîye vînenî. Ma koalîsyonê mîyanneteweyî sey muttefîq vînenî. Tirkîya hewl dana herême dagîr bikera.”
Ma do bêveng nêmanî
Fermandar Mîkeyî zî va ‘ma do heta ke DAÎŞ werte ra bêro wedarnayene, pîya hereket bikerî’ û wina domna: “Soz dana ke ez do mektûba şima biresna selahîyetdaranê koalîsyonê mîyanneteweyî.”
Hemserekê Meclîsê Hesekê Ebdulxenî Osoyî zî va ‘eke Tirkîya herişê erdanê ma bikero, ma do bêveng nêmanî’ û wina dewam kerd: “Ma têkoşîn de 11 hezarî şehîdî dayî. Ma amade yî ke qezencanê xo bipawî. Ma vera tehdîdan de piştîya xo nêdanê dewletanê teberî, ma hêzê xo şarê xo ra gênî.”
Çalakîye bi eştişê siloganan qedîyaye.
MERKEZÊ XEBERAN