Keyeyê Barzanîyî û partîya înan vanî: “Ma Referandûmê Xoserîya Kurdistanî virazenî.” Wexto ke qiseyê Kurdistanî bikewo meydan, yew meraq nêkeno û nêvano, Kurdistano ke ser o yeno qalkerdiş, çar parçeyê Kurdistanî yo, yan zî Başûrê Kurdistanî yo? Yan zî zereyê Başurê Kurdistanî de tena çend bajarî yê...
Eke (eger) kesêk hina biewnîyo, rastîyan zî vîneno. Keyeyê Barzanîyî vanî ‘ma Referandumê Xoserîya Kurdistanî virazenê’. Hina vanî, la pêronê partîyan Silêmanî de beşdarê Kombîyayîşê Şewrê Neteweyî yê Kurdistanî benî, Keyeyê Barzanîyî û partîya înan beşdar nêbenî. Keyeyo ke beşdarê Şewrê Neteweyî yê Kurdistanî nêbo, senî Xoserîya Kurdistanî wazeno? Qerarê Referandumê Xoserîya Kurdistanî gêno, la qet vînayîşê partîyanê bînan nêgeno. Tena ser Duhok û Zaxo tesîrê înan esto. Reyna vanî Kurdistano Xoser. Ma keyeyo ke Kurdistano Xoser (serbixwe) biwazo, senî wayîrê keyeyê Mesud Barzanîyî vano, “Ma temînatê (ewlehî) dewleta Tirkîya yê. Ma eleqeyê Kurdê Vakur û Rojhelatî nêkenê. Wa Dewleta Tirkîye û Îranî ma ra bawer bikero. “
Tena bajarê Duhok û Zaxo benî Kurdistan? Serwerîya ke ser her di bajaran da bivirazîyo, ci ra yew neşkeno vajo Kurdistan. Yew vajo encax bibo bibo, beno “Barzanistan.”
Nufûsê bajarê Duhok û Zaxo en zaf 1 mîlyon û 500 hezar o. La pêronê hûmarê kurdan 50 mîlyonî ra vêşêr a. Ma xoserîya 1 mîlyon û 500 hezarî, senî beno xoserîya 50 mîlyon kurdan!...
Ma tena Duhok û Zaxo benî Kurdistan! Rojawanê Kurdistanî de 14 bajarî, Vakurê Kurdistanî de 23 bajarî, Rojhelatê Kurdistanî de tewr tayî 20 bajarî, Başurê Kurdistanî de 14 û 15 bajarî estî. Nê bajarî mîyanê Kurdistano Xoser de canêgirî, Duhok û Zaxo tena serê xo senî benî Kurdistano Xoser!
Hîrayîya Kurdistanî tena hududê Duhok û Zaxo nêgena zereyê xo. Hîrayîya Kurdistanî 500 hezar km kare ya. Kurdistano Xoser tena Duhok û Zaxo bigîro zereyê xo, erdê Vakûrê Kurdistanî, bajarê Başûrê Kurdistanî, Rojawanê Kurdistanî û Rojhelatê Kurdistanî se benî?
Hetanê 50 mîlyon kurdî azad nêbî, hetanê 500 hezar km kare erdê Kurdistanî binê dagîrkerîya dişmenî ra nêro xelaskerdiş, hetanê pêronê bajarê Kurdistanî yê çar parçe yewe bi yewe mîyanê Kurdistano Xoser de canêgirî, kam vajo ma Kurdistano Xoser awan kerdo, zuran keno.
Çunke dişmenê kurdan, Kurdistan kerdî çar parçe. La Kurdistan yew o. Hetanê pêronê parçeyê Kurdistanî azad nêbîy, parçeyê bînî zî tehluke de yê. Xelasî û rizgarîya Kurdistanî pê yewîya neteweyî û yewbîyayîşê çar parçeyanê Kurdistanî beno. Yanî qederê Amed, Hewlêr, Sinê û Qamişlo yew o. Yanî Barzanistan nêbeno Kurdistan.