Esnafê ke Sûka Simerî ya qezaya Rayîrê Îpegî ya Wanî de xebetîyenê, nika ra qerarê xo yê referandûmî aşkere kerdî. Goreyê esnafan seba vatişê ‘Nê’yî bi sedan sebebê înan estî. Babet ser o esnafê Bazarê Simerî qisey kerdî.
Esnafan ra Nazmî Akkuşî qiseykerdişê xo de îqtîdarê 15 serran yê AKPyî ard vîr û wina va: “Ma nêwazenî merg û qetlîamî bibî. Wexto ke merg û qetlîamî bibî ma do senî vajê ‘ya’. Keyeyê ma ameyî rijnayîş. Seba ziwan û kulturê ma çîyêk nîno kerdiş. Cok ra ma vanê nê.” Esnafan ra Suleyman Bulutî zî wina va: “Parlamenter û hemserekê ma tewfîqkerde yî. Cok ra ma vanê nê. Ma rejîmê yew kesî qebul nêkenî. Her roja ke şona hetê ekonomî ra rewşa ma hîna xirab bena. ” Esnafê bi nameyê Adem Aktaşî zî vist vîrî ke her roje vayî zêde bena û wina va: “Ma nêeşkenî nan bîşêrî keyeyê xo. Her çî zaf vaye bîyo. Helbet rewşêka winasî de ma do referandûm de vajî nê.”
DÎHABER/WAN