15ê Teşrîna peyêna 1938î de Seyîd Riza û çend embazê xo Dêrsim de ameybî îdamkerdiş û cenazeyê înan cayêko nîno zanayîş de ameybî definkerdiş. Vizêr Serrgêra 80. ya îdambîyayîşê Seyîd Rizayan bî. 

Babete ser o Federasyonê Elewîyê Demokratîke (FEDA) û Kongreya Komelê Demokratîke (KCD) îzehetêko nuştekî dayî û bi rêzdarî Seyîd Riza û embazanê ci cad kerdî.

FEDAye îzehetê xo de Seyîd Riza û embazanê ci yad kerde û îzehet wina dewam kerdo: “Herçiqas ke 1938 de waştî şarê ma hetê tarîx, kultur, bawerî û ziwanî ra qir bikerî zî cewhero ke erdanê ma de estbî, newe ra ganî bî û heta roja ma ya ewroyên ame.”



Ma do sere nêronî

FEDAye îzehetê xo de wina vato: “Seba ke Qizilbaşîya kurdî vera sîstemê tek tîpî de reaksîyon nîşan dayêne û qebul nêkerdêne, şarê Dêrsimî rê qetlîyam  rewa ame dîyayîş. Cuya tek tîpe teberê heqîqeta elewîyan a û nîna qebulkerdiş. Cuya elewîyan komanlîte esas gêna. Bi qetlîyamî waştî zirar bidî têkilîya Pîr-Talîp- Murşîtî. Reyna nê qetlîyamî ra dima pîyatîya erd û merdimî zirarêko gird dî.”

FEDAye peynîya îzehetê xo de wina va: “Kalikê ma vera zulmî de sere nêronayî û ma zî sey neslo ke sey kalikanê xo zaf zulm û qetlîyaman ra derbaz bîyî. Bin nameyê medenîyetî de ma raştê polîtîkayanê qirkerdişî ameyî. Ma serrgêra 80. de yewna rey Zîhnîyetê Neheqî lanet kenî. Ma şexsê Pîrê xo Seyîd Rizayî de heme vînîbîyayeyanê xo bi hawayo rêzdar yad kenî û vernîya înan de vileyê xo çewt kenî.”


KCDyî zî Seyîd Riza û embazanê ci yad kerd

KCDyî zî babete ser o îzehetê xo de va ‘herçiqas ke selahîyetdarê dewlete ge gane seba têmîyankerdişê vîrê elewî û kurdan tayê îzehetî dayî zî, nêyî hertim bi hawayo taktîkî bîyî’ û wina dewam kerd: “Hêvîya ma hemînan a ya ke wa sucanê xo reyde têrî manî, ozrê xo biwazî û cayê mezelanê Seyîd Riza û embazanê ci nîşan bidî.”

KCDyî îzehetê xo de wina vato: “Helbet çîyê ke şexsê elewîyan de bîyî parçeyê polîtîkaya topyekunî yî. Şêx Seîd, Agirî, Zîlan, Qoçgîrî, Gurgum, Sêwaz û roja ma ya ewro Sûr, Cizîr, Nisêbîn, Silopî û sewbîna heme parçeyê eynî polîtîka yî. Ewro torinê Seyîd Rizayan pey xoverdayîşê înan de şonî û xoverdayîşêko tarîxî veto. Ma yewna rey şexsê Seyîd Riza û embazanê ci de heme şehîdanê xo bi rêzdarî yad kenî.”


NAVENDÊ XEBERAN