Teşrîna verêna serra 2014 de Kobanê de ma mîyanê pêrodayîşî de raştê Apê Nemirî amebî. Her şer bi sembolanê xo yeno vîra merdimî. Şer bi xo bêro vîrîkerdiş zî sembolê şerî nînî vîrîkerdiş. 2 serrî ra pey ez reyna ameya Kobanê û seba ke ey reyna Apê Nemirî reyde sohbet bikera, ver bi Kanîya Kurdan kewta rayîr. Wexto ke ma resayî Apê Nemir ma lingan ser de pêşwazî kerd û ma dawetê zereyî kerd. Kewtişê odeyî de 2 çarçewayê ke aliqnaye bîy, bala mi antî. 

Ma dest bi qiseykerdişî kerd û şerwanêk dest bi vatişê rewşa şerî kerd. Apê Nemir senî ke qala şerî eşnawit, wina va: “Wexto ke ez nêşîya şer, şima şîyî an nêşîyî ez se bikera. Ez çend rojî verê şîya hetê embaze Sorxwîne (Xoverdakara Kobanê). Ma tayê qisey kerd û ya mi ra va ‘ti çîyêk wazenî?’ Mi zî va ez çîyêk nêwazena, labelê eke rojêk ez keyeyê xo de bimira, wa mezelê mi ser de ‘deyndar bî’ binusî.”

Kam se bikero, seba xo keno

Dima ra ma tayê hîsin bîyî. Apê Nemir qala dîmenê ke ma di serrî verê antbî kerd û wina va: “O wext kesêk dîmenan temaşe keno û bi hawayêk xo resna hûmara telefonê mi û mi gêra. Wexto ke televîzyon de binê betanî de meterîsî mîyan de mi vîneno, xo bi xo vano ‘ma ez zî merdim a’ Kam se bikero, seba xo keno. Ma seba çîyêk ti kesî rê minet nêkenî. Labelê ez tena seba çîyêk qehiryena; ez birîndar bîya û mi temam nêkerd.” Dima ra polê xo yo çepî nîşanê ma da, seba ke parçe bîyo, platîn dekerdî mîyanê polî. Nê semedî ra Apê Nemir nêeşkeno polê xo têbido û va: “Platîn dekerdî polê mi û o zî çewt o. Ez ge-ge xo ra cigiryena û vana ez do sîlehî binê polê xo ra bibesta û şêra şer. Raştîya xo de destê mi tayê baş bîbî. Wexto ke mi eşnawit ke Qirkerdişê Kobanê de zaf kesî şehîd bîyî û lajê mi Osman zî birîndar bîbî, ez şîya mi reyna sîleh girewt û şer kerd. Dima ra ma erşawitî Vakur. Wexto ke ez Riha de amelîyat bîyêne, kişta mi de sedye ser de yew DAIŞî estbî û bi erebkî kurdan rê lengî çînayêne. Ti kes çîyêk fam nêkerdêne. Mi zî xo nêgirewt bi erebkî, kurdî û tirkî ci rê lengî çînayî. Na rewşe ser o zorê doktorî şî û polê mi wina çewt verda.”

Apê Nemir bêmerd o

Apê Nemir dewam keno û wina va: “Şîyayîşê şima ra çend rojî dima, ez birîndar bîya. To dî mi şima ra vatbî 2 lajê mi zî şer kenî, raştîya xo de 2 nê, 3 lajê mi tîya de bîyî. Labelê xebera ma yewbînan ra çinêbî. Şima ra dima embaz Elî ame û telefonî da mi û va domananê xo bigêre. Mi zî va ‘yê ke tîya de yî heme domanê min î, ez nêgerena’. Dima ra birazayêkê mi gêra û va ‘xalo ma to televîzyon de dîyo’. Mi zî ci ra va ‘şer giran o, telefon pade’. Aye roje ma 7-8 çete kiştbî û cenazeyê înan ziqaq de bî. Dima ra embazan werd amade kerdbî, veng da ma. Mi va ‘şima şêrê, beno ke nêyî bêrî cenazeyanê xo bigirî, cok ra ez nobete tepîşena. Badê ez zî şîya werd, labelê wexto ke mi dî ke dem û awe yewbînan ra cîya kelênayî, mi zî henek kerd, mi va ‘şima reyna sey tirkîyayijan çay viraşta’ û ez agêraya meterîsê xo. O wext dêmek ez derîyaya. Mi vengêk eşnawit û dima ra mi polê xo de dejêk hîs kerd. Ez ver bi merdîvenan şîya û embazî resayî mi. Wexto ke mi dî ke embazî zaf hîsin bîyî, mi zî va ‘Bicûyî xoverdayîşê Kobanê, Nemir bêmerd o û ez hûyaya. Dima ra embazan seba tedawî mi erşawit Vakur.”

Fotografê nefele

Wexto ke Apê Nemir qisey kerdêne, çimê mi fotografo ke ma meterîsê Nefele de antbî, gina. Eynî fotograf de Îbrahîm Vahap zî estbî; Trabzon ra seba seferberî amebî. Wexto ke ma ci reyde roportaj viraşt û 3 rojî dima şehîd kewtbî. Reyna fotografo bîn de zî Amed Cûdîyo ke pîyê xo reyde şer kerd, estbî. Apê Nemir wina dewam kerd: “O wext hêrişê giranî estbî û dîmenê ke şima antbî, ê dîmenan de çimê mi ra hêsirî amebî war. Ê hêsirî zeyîfî ver nêbî. Dormeyê mi de ciwanê 18-20 serreyî şer kerdênê û şehîd kewtênê. Zaf zorê mi şîyêne û ez bermayêne. Ez 70 serreyî bîya û Nefela kişta mi de 21 serreyî bîye. Ez wextê çalakîya nobete ke sînorî ser de, bi guleyê gazî birîndar bîya, la kamî pers kerdêne ‘mi vatênê dimpiştikî mi dayo’. Reyna hîna şer dest pênêkerdbî, ez linga xo ra birîndar bîya, la mi qala ci daxî nêkerd.” 


Apê Nemir vist vîrî ke lajê ci “Osman heta peynî Kobanê de şer kerd, çîk nêbî, la qirkerdiş de şehîd kewt” û bi nê vatenan qalê qirkerdişo ke 25ê hezîrane de bî, kerd: “Domanêk ame, destê xo ra birîndar bîbî. Wexto ke ma va se bîyo, va ‘DAIŞî dayo mi ro’. Mi zî va ‘embazan Sirrînî girewto, beno ke pîrozkerdiş de gule bi şaşî to ginayo’. Domanî va ‘nê DAIŞ kewto bajarî mîyan’. Dima ra mi vengê sîlehê kanasî eşnawit. Êdî mi bawer kerd. Her çiqas zaf kesan de sîlehî estbî zî, vatbî qey embaz î, panênaybî. Tîya de nizdîyê 5 hezar merdimî estbî. Mi zî sîlehê xo girewt û dest bi panayîşî kerd. Eke ma gule nêreşanaynê, do bi wesayît bikewtênê mîyanê înan, hemînan bikiştênê. Dima ra şîyî berê sînorî ver de xo teqnayî. Lajê mi Osman zî sereyê xo ra gule weno û reseno şehadet.”


Osman ver bi sînor şi


Cinîya Apê Nemirî Dayîka Şemsêye zî qisey kerde û wina va: “Lajê mi Hesen sînorî ser de nobete tepiştêne. Berê sînor de wesayît teqnayî. Heme embazê ci şehîd kewtî, Hesen zî vir beno la çîyêk ci rê nêbeno. Embazê ci Comert û Mehmud hetê ci de şehîd kewtî. 

Ma seba Hesenî etiryayênê, la ma çi zanayêne ke Osman ver bi sînor şono û ewja de şehîd keweno. Domanêko birîndar ver bi keyeyê ma ame, mi dirbeta ci pak kerd. Dima ra wesayîtêk ver bi ma ameyêne. Lajê mi Huseyînî embazê xo ra va ‘Bide piro keso ke yeno, yê çeteyan o’ Embazê ci va ‘nê, embaz î’ Lajê mi sîlehî destê ci ra girewt û da piro. Wexto ke heto bîn ra zî embazan da piro, kesê ke mîyanê wesayîtî de bîyî xo teqnayî. Ma Hesen û Osmanî gêrayî, telefonê înan cewab nêda.”  


ABDURRAHMAN GOK / DÎHABER / KOBANÊ