Qezaya Sûrî ya Amedî de taxê Lalebeyî û Alîpaşa zî çarçewaya vurîyayîşo şaristanî de rijnayîş reyde rî bi rî yî. Ame musayîş ke muezînê ke camîyanê taxan de xebetîyenî, mînareyanê camîyan ra anons kerdî û vatî ke ganî mîyanê hewteyêk de taxî bêrî vengkerdiş. Anonsî de ameyo vatiş ke qerar hetê Qeymeqamîya Sûrî ra ameyo girewtiş. Kesê ke nê taxan de ronîşenî, vera nê qerarî de bi hawayo wişk reaksîyon nîşan dayî û dîyar kerdî ke ê do destûr nêdî keyeyê înan bêrî rijnayîş. 

Dano hetgiranê xo 

Ramazan Çakiro ke taxe de esnafî keno, va ‘dewlete hewl dana Sûrî pêşkêşî hetgiranê xo bikera’ û wina domna: “Tîya de tewr kêmî 1 hezar û 500 keyeyî estî û tîya rew a rewe nîno vengkerdiş. Nê keyeyî do şêrî kura. Ma nêşênî TOKÎyan de bicuyî. Bi nê qerarî hewl danî şarê Sûrî ceza bikerî. Dewlete seba ke hetgiranê xo dewlemend bikera, wazena Sûrî birijna. Dewlete bi no hawa wazena dewrê sektoranê hetgiran bikera û faalîyetanê xo bidomna.” 

Ma do nêşêrî cayêk 

Muhterem Demîre zî va ‘ez nêwazena ke keyeyê mi bêro rijnayîş’ û wina dewam kerde: “Ma do şêrî kura. Ma nêşonî cayêk. Ti kes nêwazeno ke keyeyê ey bêro rijnayîş. Xora îmkanê ma çin o ke ma şêrî sewbîna cayî. Ma nêzanî çira keyeyanê ma rijnenî. Heta nika ma rê çîyêk nêameyo vatiş. Nêşênî vajî ‘hadê ma 6 rojan de keyeyanê şima rijnenî’. Çîyêko winasî nêbeno.”Remzîye Kurtuluşa ke heme emrê xo Sûr de derbaz kerda, wina va: “Ez nêşêna nê emrê xo ra pey kîra de ronîşa. Ez destûr nêdana ke keyeyê mi birijnî. Taxa Alîpaşa de merdimê feqîrî cuyenî. Hedefê dewlete o yo ke heme şarê feqîrî ceza bikero. Sûr tarîxê min o; doman û torinê mi tîya de ameyî dinya. Ez nêwazena ke tarîxê mi bêro rijnayîş.” 

Ez nêteriknena 

Turkan Ogurlîyane zî dîyar kerde ke aye hema newe tamîrê keyeyê xo kerda û do destûr nêda ke keyeyê aye bêro rijnayîş. Ogurlîyane wina domnaye: “Ez bimira zî Sûrî ra nêvejîyena. Xora rojêk merg esto. Ha rojêk erey ha rojêk rew, êdî xemê mi de nîyo.”

Giyasettîn Dînço ke 20 serrî yo ke taxa Lalebeyî de ronîşeno, ard ziwan ke mîyanê anonsê rijnayîşê keyeyan de sewbîna çîyî estî û wina va: “Ma nêzanî ke seba çi keyeyê ma yenî rijnayîş. Eke qerarêko winasî bêro girewtiş daxî ganî malumat bidîyo şarî. Anonsê nêyî camîyan ra kenî. Ma do keyeyanê xo nêteriknî. Seba ke dest ronî dewlemendîyanê binerdanê taxe, tîya veng kenî.”

Remzî Ogirlîyanî zî vera qerarê rijnayîşî de reaksîyon nîşan da û va ke ê do keyeyê xo nêteriknî.  


DÎHABER/AMED