Serra 2011 de bajarê Wanî de zelzeleyêko pîl virazîya. Netîceyê zelzeleyî de xeylê kesî merdî û xeylê awanîyî zî rijîyayî. Zelzele ra hende serrî vîyartî, labelê mexdurî hema zî awanîyê konteynir, prefabrîk û konan de cuyenî. Na rewşa mexduran seba hukmatê AKPyî bîye firsend û hukmatî dest bi viraştişê awanîyê TOKÎyan kerd. Viraştişê awanîyan de xeylê darî birîyayî û tebîet ame qetilkerdiş. Kesê ke awanîyanê TOKÎ de cuyenî, bêhewa yî û kulturê cîrantî ra gerrekar î. Babete ser o cinîyê Wanî qisey kerdî.
Cinîyan ra Perînaz Bîlene qiseykerdişê xo de nêrazîbîyayîşê xo arde ziwan û wina va: “Zelzele de xeylê kesî merdî û keyeyê ma rijîyayî. Hukmat, seba ke ma kulturê xo ra dûrî bibî, ma dekerd awanîyanê TOKÎ. Tîya de cîrantî çin a.”
Wazenê çin bikerî
Şirîn Ûnvere destpêka qiseykerdişê xo de dîyar kerde ke roj bi roje awanîyê TOKÎ hîna zêde benî û wina va: “TOKÎyan de boya ma nêvejîyena. Ma nêeşkenî TOKÎyan de bicuyî. Domanî mîyanê awanîyê şenikan de hepis î. Awanîyê berzî ma kulturê ma ra dûrî kenî. Cuya ma awanîyê tengan de hepis bîya.”Halîme Demîre zî wina va: “Ma nêwazenî nê awanîyê berzan de bicuyî. Tebîetê ma ser de rant esto.”
ŞÛJIN/AMED