Kombîyayişê Koma HDP de no hefte Hemserok Selahattîn Demîrtaşî qisey kerd û hayr ant mitîngê Yenîkapi ser. Demîrtaşî va HDP ewja de çinêbî, çike tenya jû partîya ke bi Gulenî eleqeyê xo çinya HDP ya û aşkere kerd ke AKP, CHP û MHP hewl danê ke sûcanê xo yê verên bi ala binimnê. Demîrtaşî eleqe ant tecrîdê Îmrali ser zî û aşkere kerd ke hikûmet bi xo provokasyonî kena. 

Selahattîn Demîrtaş ke derheqê rojdemî de qisey kerd hayr ant kerdenanê OHALî yê girotxaneyan ser û da zonayen ke girotxaneyan de nika kerdenê wextê 12ê Îlone yenê ciwîyayen. Demîrtaş vist vîrî ke girotxaneyan de binlingkerdişê heqan ra Wezîrê Edalet mesûl o û va; jew welatî de eke girotxaneyan de heqê merdiman çinîyo se, teber de geyrayişê ci ra hewce nêkeno. 


Werte de xapînayiş çînyo, pîyakarî esto

Demîrtaşî hayr ant qewimyayişanê hewldayena derbeya 15ê Tîrmeh ra na het ser û aşkere kerd ke mesele xapînayiş nîyo, AKP wexto ke amê hikmî ser bi zanabîyayiş vernîya raya Cemaatî akerd. Demîrtaşî vist vîrî ke hedef kerdî ke bi kesanê muxafezakar dewlet bigîrê dest û wina dewam kerd: “Kadroyê kemalîstî dewlet ra tesfîye kerdî, hurendîya ci de kadroyê cemaatî ronay. Kesî kes nêxapîna, Erdogan û cemaat pîya gureyay. Îtifaqekê viraştî. La peycoy wexto ke cemaat bi qetîn bi peymanî xirab kerd. La eke şima vanê ma amey xapînayen û ma poşmanîyê, şima êşkenê encex qanûna poşmanî ra poşt bigîrê.”

Demîrtaşî aşkere kerd ke nêwazenê ke Gulan bidîyo Tirkîye. Vatişanê ci ra tersenê û va, eke jew welatî de behsê îdam û îşkence yeno kerden se îadekerden mumkin nîyo. Demîrtaşî va, badê bewnê ke dewleta esasî Gulen o, paralel nê yê. 


Baloyê maskeyîjan

Hemserok Selahattîn Demîrtaşî vist vîrî ke civak dûştê derbe yo, no raveyşîyayişekê zaf rind o û wina va: “Nayî ra Yenîkapi de pêhetameyişê bi mîlyonan kesan rind o. La Yenîkapi de serva sehne nêşkena eynî çî vaja. Hîsê şarî çi qe samîmî be, sehne zî hendayî kirêt bi. HDP ewja de çinêbî çike tenya jû partîya ke bi Gulenî eleqeyê xo çînya HDP ya. AKP, CHP û MHP bi organîk eleqeyê ci bi Gulenî estbi. Xebera tayînan derbe ra estbî.”

Demîrtaşî da zonayen ke sehneyê Yenîkapi açarnîya sehneyê guna vetişî û wina dewam kerd: “Helbet HDP ewja de nêbena. HDP kinarê derbe de kî nîya. Namzetê Serokkomarîn yê MHP-CHP kê belû kerd, ez hurdî lîderanê muxalefet ra pers kena?  Nika zî 3 partî şerm nêkenê werzenê û vanê HDP bi FETO pîyakarî kena. Cayo ke rîwalê sûcanê xo yê verên şarî ra efû biwazê û ders bigîrê hewl danê bi ala binimnê. Ewja de pêameyiş çîno, baloyê maskeyîjan esto. Ewja ra pêameyiş û demokrasî nêvejyeno.”  


Ma no îtifaqî de çînê

Selahattîn Demîrtaşî vist vîrî ke tayînan vato; ‘Eke HDP amêbîyaybi mitîng mi nêeşkîyabi hesab bidî şehîdan’ û va, eke HDP şîyaybî do nêşîyabi biewno çimandê Ceylanî, do senî cewab dabîyabi Hûrşît Kulterî? Demîrtaşî da zonayen ke eke HDP şîyaybî do hesabê nînan perskerdiyabi û wina dewam kerd: “HDP nêşiyaybi Şirnex, Colemêrg, Sûrî xo vîra bikero û şiro Yenîkapi. Eke îtifaqê şima no yo ma no îtifaqî de çinyê.” 


‘Ma dînamîkê tewr gird yê no welatî yê’

Hemserokê HDP Selahattîn Demîrtaşî aşkere kerd ke ê îtifaqekê demokratîk ra hadre yê û va la ma nêşkenê pêrokîn qewimyayişan xo vîra bikerê û raya xo de dewam bikerê. Demîrtaşî va; ‘ma dişmenê no welatî nîyê, lete û dînamîkê tewr gird yê no welatî yê’ û wina dewam kerd: “Şima nêşkenê bi pêhet ameyiş HDP zey dişmenî îlan bikerê  û xo zî pîr o pak vejerê. No têkoşîno û ma her çî gênê ver çiman û no têkoşînî dewam kenê.” Selahattîn Demîrtaşî da zonayen ke ganî sûc û mesûlîyetê bîyayişan nêerzîyo jew kesî, ya zî jû komî ser û va, la no rewşî ra vejyayiş zî jew merdimî pey de vazdayiş nîyo. 


Hikûmet bi xo provokasyon kena

Selahattîn Demîrtaşî tewr peynî de hayr ant rewşê Rayverê Şarê Kurd Abdullah Ocalanî ser û derheqê babed de hikûmet bi provokasyonî sûcdar kerd. 

Demîrtaşî persa ‘demekê winayîn de çi maneyê ramitişê tecrîdî esto’ kerd û wina va: “Nûman Kûrtûlmûş bi xo vano derbekaran do verra Îmrali operasyon viraştiba û herbê mîyanî vetiba. Madem ti no hesasîyetî zanê çima destûr nêdanê ke pawitoxî şirê? Çima serva ke vernîya kaosî bigîrê gamî nêerzenê? Derbekarî kamcî emelî rê xîzmet kenê se, şima zî eynî çî rê xîzmet kenê. Heqê pêdiyayişî yê her tepişteyî esto. Wextekê hendayî krîtîk de şima çima nayî rê destûr nêdanê. Şima nêşkenê jew lîdero ke şima serrekê nîm pê ra muzakere ramitî neyî ferz bikerê. Nameyê nayî provokasyon o. Welat derbe ra ravêrdo. Heqê pawitox û malbatî esto ke derheqê rewşê ci de zonayişî bigîro. Nezdîbîyayişê şima yê Îmrali û yê derbekaran eynî yo.  


  DÎHA/ENQERA