Endamê Meclîsê Şaredarîya Pêrî tayînkerdişê qeyûmî ra nata nênê girewtene zereyê bînaya şaredarîye. Hemşaredarê Şaredarîya Pêrî Orhan Çelebîyî waşt ke nê kerdişê bêhuqûqî do bêrê qedînayene.Temsîlkaranê dezgehanê Dêrsimî zî vat ê qeyûmî nas nêkenê.
Dima ke seba Şaredarîya Pêrî ya Mazgêrdî ya Dêrsimî qeyûm ame tayînkerdene endamê Meclîsê Şaredarîye yê HDPyî nênê girewtene zereyê bînaya şaredarîye.
Hemşaredaran Orhan Çelebî û Songule Dogan, Rêxistina HDPyî ya Dêrsimî, Federasyonê Komeleyanê Dêrsimî (DEDEF), Komeleya Kulturî û Paştdayîşî ya Mazgêrdî, Komeleya Dêrsimijan ê Alîbeykoy û Komeleya Xoza ya Dêrsimî vera na rewşa nêrazîbîyayîşê xo mojna û çalakîya protestoyî kerde.
Hemşaredar Orhan Çelebîyî verê bînaya şaredarîye eşkerayîyêke daye û vat: “Ewro roja 21. a xespkerdişê şaredarîya ma ya. A roje ra nata şaredarîye xizmet nêdana şarî. Mabênê şar û şaredarîye de barîkatî estê. Ma na rewşe protesto kenê û ganî şaredarîye cade berê xo seba şarî abika.”
Serekê DEDEFî Alî Haydar Benî zî çalakîya protestoyî de qisey kerd û vat: “Sîstemê qeyûmî antîdemokratîk û keyfî yo. Ganî na bêhuqûqîye bêra vindertene. Ganî şaredarîye seba şarî akerde biba la nika dormeyê ci bi wesayîtanê zirxînan ame girewtene. No mojneno ke mabênê şarî û şaredarîye de sînorî estî.”
Ma do xebatanê xo dewam bikê
Endamê Komeleya Kulturî û Paştdayîşî yê Mazgêrdî Mustafa Arslanî zî vat: “Ma waştêne ke Şaredarîya Pêrî reyde berardiş bidê ganîkerdene la bi qeyûman nê projeyî ameyî astengkerdene. Ma paştî danî hemşaredaranê ma û ma do xebatanê xo dewam bikê.”
Bi nameyê Komeleya Xoza ya Munzurî Alî Yildizî vat: “Ma nê kerdişanê faşîzanan û antîdemokratan şermezar kenê. Ma paştî danê şaredarîya xo û ma qeyûman nas nêkenê. Ma wayîrê têkoşînê demokratîkî yê şarê xo vejîyenê.”
ANF/DÊRSIM
Colemêrg qeyûm qebul nêkeno
Roniştoxê Colemêrgî vanê eke zaf neçare nêmendî nêşinê şaredarîye ya ke ameye xespkerdene û ê do qet qeyûm qebul nêkerê.
Dima ke Hemşaredar Cîhan Karaman 19ê teşrîna verêne de ame destbendkerdene û tepiştene qeyûm şaredarîye rê ame tayînkerdene. Dima meclîsê şardarîye ame batalkerdene, wezîfeyê hemşaredaran û meclîsê şaredarîye teslîmê qeyûmî ame kerdene. Roniştoxê Colemêrgî vanê ke bi destê qeyûmîhetê AKPyî ra dest nayîye îradeyê înan ser û wazenê ke hemşaredar Karaman newe ra bêro pêşkêşkerdene.
Roniştoxanê Colemêrgî ra Kahîr Demîrî vat: “Erdogan vano êyê ke bi weçînayîşî dest pê wezîfeyî kerd, têna bi weçînayîşî eşkenê wezîfeyê xo ca verdî. Heyf o ke şaredarîyê ma bi weçînayîşan ney bi qeyûman ameyî xespkerdene. No seba ma colemêrgijan û pêro kurdan heqaret o. Kurdî do qet nê xespê înan qebul nêkerê. Wextê HDPyî de berê şaredarîye tim akerde bîyî la nika ma nêwazenê xo nêzdîyê ci bikê. Bînaya şaredarîye seke bîye qereqol. Eke ma neçare nêmendî ma nêşinê şaredarîye.”
Cafer Încîyî zî pare kerd ke ê hemşaredaranê xo wazenê û vat: “Qeyûm seba nê şaristanî û şarî xizmetêk nêkeno.”
Faîk Palayî zî vat: “Ma wazenê hemşaredarê ma agêrê şaredarîye û mîyanê şarî. Roniştoxê Colemêrgî nêşinê şaredarîya AKP û qeyûmî.”
ANF/COLEMÊRG