Nisêbînijan dîyar kerdî ke iyê dê ser sindoqan de hesabê polîtîkayanê welişnayîşî û koçkerdişî bipersê û vengê ‘Nê’ day.
Qezaya Mêrdîn Nisêbîn ra welatijan day zonayen ke iyê dê te wext kerdenanê hikûmeta AKP xo vîr ra nêkerê. Dayika 6 domanan Îne Ak vera polîtîkayanê şer yê AKP rê nêrazîbîyayîş damûsna û vist vîrî ke a do vera zilmî vajo ’Nê’. Ak da zonayen ke înan serranê 1990î ra na het zilmê dewlet ti wext qebûl nêkerd û dê neyra tepya zî qebûl nêkerê. Îne Ak ard ziwan ko do şarê Nisêbîn şiro ser sindoqan û vajo ’Nê.’
Welatijan ra Îsmaîl Akalan’î zî vist vîrî ke, eke AKP sixtekarîyan nêkero, xo ra do qezenc nêkero û va, eke weçîntayîşeke bi edelet bo, xo ra ma dê qezenc bikerê. Ganî ma ray nêdê sixtekarîyan. Akalan’î hayr ant hêrîşanê faşîst yê dewlet yê vera Nisêbîn ser û va: “Her kes taxanê ma vîneno. Ma dê senî vajê ‘Ya’. Şarê Nisêbîn zano do vajo çi.
‘Ma qurbanê înan nîye’
Yunus Okmen’î zî vist vîrî ke kesê ke Nisêbîn de cuyayê, ti wext nêvanê ‘Ya’ û wina dewam kerd: “Her çîye ma rijnay û veşnay. Ma xêlê çîye xo kerdî vinî, la ma şerefhe xo vinî nêkerd. Ma zanê ke çi destê îxtîdarî ra bîro do bikero. La ma do zî çi destê ma ra yeno, bikerê. Heta ke quweta mi bibo, ez a seba ke ‘Ya’ nêvejyo, bixebta. Ma qurbanê înan nîye.
Okmen’î veng da her kesî ke şirê ser sindoqan û wayîrê namûs û şerefê xo bivejyê. Yunus Okmen’î da zonayen ke vengêk tenya zî zaf muhîm o û va: “Eke ma ewro nêvajê ‘Nê’, do rijnayîşê keyeyan dewam bikero. Ma dê têkoşîna 35 serran ra fek veranêdê.”
‘Ma dê bi quwetekê gird şirê ser sindoqan
Cinîya bi nameyê Sidika Akalan hayr ant dej û janê ke dewlet ferzê înan kerdo ser û va, ‘Dejê ke ma antî, ma bêquwet nêkenê, eksê nayî ma biquwet kenê.’ Akalan aşkere kerd ke, hendayî ezîyetî ra dima iyê dê bi hewayekê xurt şirê ser sindoqan û qiseyanê xo bi nê vatenan qedêna: “Fikrê ma qet nêvurnîyay. Eke ma bibê yew û vengê xo bixebtinê, ma dê verî ra biquwet bê. Wa herkes vengê xo kar bîyaro. No weçîntayîşî de tenya waştenekê ma esta, wa ’Nê’ bivejyo û no adir bîro tefînayîş. Dewlet verîya nika hêrîşê Nisêbîn kerdbi û xêlê taxan û keyeyan welişnabi.
MÊRDÎN