Bi nameyê Mercan Depremî de cinîya ke endamê Eşîra Sînemîllî ya, emrê xo bi vera rolê zayendê komelkî de vindetişî derbaz kerdo. Mercan Depreme wina vana: “Ma zextê ke ma ser o yenî ferz kerdene dî û ma xo aver berd. Ez nika seba bedilnayîşî têkoşîn dana.”

Ocax û Eşîra Sînemîllî ke kurd û elewî yo, seba elewîyanê Gurgumî zaf muhîm o. Keyeyê ke polê Eşîra Kalenderan ra yenî û mîyanê Sînemîllîyan de esîl hesibîyenî, dewa Kantarma ya qezaya Elbîstanî ya Gurgumî de cuyenî.

Bi nameyê Mercan Depremî de cinîya ke endamê na eşîre ya, dîyar kena ke kulturê Elbîstan û Pazarcixî yewbînan manenî û zafaneyê nûfisî yê Eşîra Sînemîllî yo. Mercan Deprema ke beşdarê heme aktîvîteyanê elewîyan bena, wina vana: “Ez roja ma ya ewroyî de vînena ke tayê merdime ocax û eşîre vejîyenî televîzyonan û ez şerm kena. Çimkî asîmîlasyonêko gird dîyeno cuyayene.”

Mercane bale ante mîyanê elewîyan de rewşa cinîye ser û wina va: “Mîyanê komelê ma de qet qaso ke yeno waştene muhîmîye nêdîyena cinîye. Ewro hîna zî wexto ke merasîmê cemî yeno viraştene, cinîyî pey de ronîşenî. Mesela cinîyê pîran mîyanê elewîyan de nînî hesibnayene û nêşênî bi tembûrê xo beşdarê merasîman bibî. Ma jêhatîbîyayîş û kulturê xo dayîka xo ra girewtî. Ma hetê dayîka xo ra ameyî resnayene û ma mîyanê eşîra xo de zext nê, destek dîyo.”

Tena kêneke ez bîya

Mercan Depreme dewamê qiseykerdişê xo de wina va: “Wexto ke ez şîyêne verdibistan, mîyanê 45 kesan de tena ez kêneke bîya. O wext komelî mîyan de zaf reaksîyonî vera ma de estbî û tayê vatişî ameyêne vatene. O wext mekteban de erebkî dîyayêne musayene, dima ra tirkî dîyaye. Wexto ke mi mekteb caverda, ez emrêko şenik de ameya zewejnayene. Dayîka mi zaf waştêne ke ez wendişê xo bidomna, labelê mi nêşêna bikera. Mi zî hewl da ê waştişê xo bi domananê xo bida kerdene. Cok ra mi heme domanê xo dayî wendene.”

‘Ma ferqê zextan de bî’

Mercan Depreme va ‘ez problemanê xo yê komelî ra cîyayêr nêvînena’ û wina dewam kerde: “Seba ke ez probleman çareser bikera, ez zaf têkoşîn dana. Wexto ke ma doman bî, camêrdêk vernîya ma ra derbaz bibîyêne, ma ra vatêne ‘çira sereyê to padaye nîyo, wa lingê to nêasî’. Ma ferqê nê zextan de bî û ma xo aver berd. Ez cuyayîşê xo ver gerre nêkena, ez hewl dana ke bibedilna. Mi bi têkoşînê xo hem mîyanê keyeyî de hem zî teber de vatişê xo bi camêrdan dayo qebul kerdene.”

Problemê cinîyan çareser nêbî

Mercan Depreme peynîya qiseykerdişê xo de wina va: “Komelê Tirkîya de problemê cinîyan hîna dewam kenî. Zextê ke cinîyan ser o estî, dewam kenî. No problem hîna çareser nêbîyo. Goreyê mi çareserîya nê problemî, ancax bi fikro ke merdimî esas gêno, bena. Seba lacekî vatişê ‘no do neslê mi bidomno’ yeno vatene û ez na cîyayîye qebul nêkena.”

 

JINNEWS / GURGUM