Seba referandûmo ke 16ê Nîsane de do bêro kerdiş cepheyê ‘nê’yî her ke şono gird beno. Tewr peynî Komeleyê ke girêdayeyê Platformê Komeleyê Başûrrojhelat û Rojhelatî yê ke Stenbol de yo zî qerar girewt ke cepheyê ‘nê’ yî de ca bigirî. Babete ser o îdarekarê komeleyan qisey kerdî.

Serekê Federasyonê Komeleyê Depî yê Xarpêtî (KARDEF) Alî Edebalîyî va ‘Bi serran şaredarîya Depî destê AKPyî de bîye û AKP 28 mîlyon deyn pey xo de verda’ û wina domna: “2014 de reya sifteyîne BDP şaredarîye qezenç kerd û heme deynî da. Dima ra qayûm tayînê şaredarî bî. Herême de tarîx û ziwanê ma ser de hêrişî bîyî. Her çiqas ke îxraç, tepiştiş û tewqîfkerdiş zaf bibî zî ma do seba ke nê bivejîyo, bixebetyî. Ma do bi keye bi keye bixebetyî. Sey ke Cegerxwînî vato ‘Eke ma nêbî yewe ma do şêrî yew bi yewe’.

Serekê Komeleya Piştîdayîşêyewbînan yê Pirsûsîyan yê Riha Kerem Şekerî zî dîyar kerd ke do Pirsûs ra ‘ya’ nêvejîyo û wina va: “Nika qayûm tayînê Pirsûsî bîyo, heme karkerî karî ra ameyî eştiş. Ma senî vajî ya.

Qirkerdiş domîyeno

Wekîlê Serekîya Pêroyî yê Federasyonê Komeleyê Dêrsimî Mesut Gerçekî zî va ‘qanûno bingeyîyo ke wazenî bîyarî, hetê heq, huqûq û demokrasî de seba Tirkîya feydeyê ci çin o’ û wina dewam kerd: “70-80 serrî verê Dêrsim de qirkerdişî virazîyayî û heta nika derheqê nêyî de ti averşîyayîş nêbî û hîna zî qirkerdiş dewam keno. Cok ra ma do xebatê nêyî bikerî. Ez veng dana elewîyan wa vajî nê.”

Ma do şarî ra vajî 

Serekê Komeleya Piştîdayîşê Bedlîsijanê Bagcilarî Raîf Hamanî zî ard ziwan ke ê do raştîya şarî ra vajî û va ‘ma do sey bedlîsijan heta peynî vajî nê’.

 Serekê Federasyonê Komeleya Êlihijan Seyîthan Basut zî bale ant neheqîyan ser û wina va: “Wa êlihijî kom bibî tena kurdan reyde nê, wa musluman, êzidî, suryanî û çiqas şar esto, înan reyde bêrî têhet. Wa keye bi keye bigêrî û vajî nê.”

Serekê Komeleya Piştîdayîşêyewbînan yê Kerboranijan Şaban Demîralî va ‘eke referandûm de ya bivejîyo, do zulm hîna zêde bibo’ û wina domna: “eke cepheyê nêyî destê yewbînan bigirî û bibî yewe û do ameyoxe hîna baş bibo.”

Ma do bixebetyî 

Serekê Komeleya Varto Veysel Guneşî va eke ‘nê’ bivejîyo do yewîye awan bibo û wina dewam kerd: “Ma do netîceyê ya yan zî nêyî de do çi bibo şarî ra vajî. Heta ke ma dest ra bêro ma do bixebetyî.”

Îdarekarê Federasyonê Komeleyê Hoçvanî Yilmaz Şîtî va ‘Erdexan cayo ke şert û mercanê ekonomîk ra merhum ameyo verdayîş o’ û qiseykerdişê xo wina domna: “Wexto ke merdim şono Erdexan, merdimî xeylê zehmetî ancenî. Dewa mi de 400 keyeyî estî labelê 18 dewî mendî. AKP 15 serrî yo ke îqtîdar de yo, la çîyêko bîyaye nêkerdo. Cok ra ma vanî nê.”


SADÎYE ESER / DÎHABER / STENBOL