Hemsereka Şaredarîya Bajarê Girdî ya Amedî Gulten Kişanaka ke herinda aye de qayûm tayîn bibi û çend cinîyanê bînan zîndan de kitabêk nuşt. Meclîsê Cînîyan yê HDPyî bi s,loganê ‘Cinîyî Gultene reyde yenî têhet’ kitabroşê Mephîsto de ameyî têhet û kitabê ‘Rengê Morî yê Sîyasetê Kurdan’ yê Kişanake da naskerdene.
Hemsereka Pêroyî ya HDPyî Pervîn Buldane zî tede xeylê parlamenterê HDPyî, nuştox, aktîvîstê cinîyî û endamê xeylê dezgehanê sivîlan zî tewrê tewrê daşinasnayîşî bîyî û paştî dayî Kişanake. Buldane derheqê kitabî de wina va: “No kitab bi emeg, rik û qerardarîye ameyo nuştene û seba têkoşînê cinîyan gamêka erjaye ya. Cinîyê xoverdayoxî zilm û zordarîye nêşinasnenî, her ca de têkoşîn danî û vera hêrişan de milê xo çewt nêkenî.”
Dima ra mesajê Kişanake hetê keynaya aye Evîn Kişanake ra ame wendene. Kişanake cinîyî silam kerdî û wina va: “Herçiqas ke hende zext û tedayî estî, labelê reyna zî ma têkoşînê xo domnenî. Çîyêk nêşkeno ameyoxê ma, destê ma ra bigîro. Meydan zîhnîyetê faşîstî yê camêrdî rê meverdene. Tena bi emegê cinîyan aştîye yena. Ganî ma her ca de rêxistine û xoverdayîşê xo berz bikerî. Wa qisawetê şima çin bo, ma sey mîlçikan azad î.”
Kitabê Gulten Kişanake hetê Pervîn Buldane ra ame îmze kerdene û aktîvîte bi deyîr û govenda cinîyan qedîya.
n ANF / STENBOL