Hetêk ra Serekê Sererkanê Pêroyî yê Îranî Tirkîya zîyaret kerd, Kombîyayîşê G20î de Pêvînayîşê Amerîka û Rûsya, Operasyonê Reqqa dewam keno, heto bîn ra zî herêmê Efrîn, Cizîr û Firatê ke her yewe 2 kantonan ra pê yenî, seba weçînayîşî amadekarîya xo kenî. Tirkîya zî hewl dana bi îzehetanê wişk û hêrişan vernîya statuyê kurdan bigîra.
Babete ser o Hemsereka Federasyonê Demokratîke yê Vakûrê Sûrîye Foza Yûsife qisey kerde.
Yusufe va ‘verê cû şekilê rêxistinbîyayîşê ma goreyê kantonî bî’ û wina dewam kerde: “Çimkî o wext herêmê Girê Sipî, Hesekê, Şedade û Şehba hema azad nêbîybî. Wexto ke nê cayî azad bîyî, lazimî bi federasyonî bîye û herêmî goreyê lazimîyan xo rêxistine kerdî. Hedefê ma o yo ke her şar bişînbo xo rêxistine bikero. Projeyê ma bingeyê xo neteweya demokratîke ra gêno. Şarê ma vera netewdewlete de sere wedarna û waşt ke îradeya ci bêro şinasnayîş. Şarê ma seba nêyî amade yo û cuyêka azad, seyyewbînanî û biewle wazenî.”
Zanî ke do tesîr bibî
Yûsife dewamê qiseykerdişê xo de dîyar kerde ke heta nika hêzê teberê ma de îzehetêko negatîf nêdayî û wina va: “Netewdewletê dormeyê ma dişmenê demokrasî yî, cok ra tehdît kenî. Çimkî zanî ke do tesîr bibî. Seba ke federasyon mîyanê xoserîya demokratîke de halo tewr hêzin o, ma federasyon tercîh kenî. Îdareyê Xoserîya Demokratîke 4 serrî yo ke karî ser de yî û êdî şar wazeno ke dezgeyê xo awan bikero. Rayîrê nêyî zî weçînayîş o. Şar do namzedanê xo biweçîno. No do cuyayîşê ma hîna bihêz bikero. Meclîso awanker seba ke projeyê federasyonî bierzo dewre ame awankerdiş û no meclîs weçînayîşan ra dima wezîfeyê ci biqedîyo.”
Ma wazenî demokratîke bikerî
Yûsife dewamê qiseykerdişê xo de va ‘ma wazenî ke awanîya ke heme probleman rê bibo çareserî, awan bikerî’ û wina domnaye: “Ma zanî ke çareserî Sûrîyeyêka Federale de ya. Ma parçebîyayîşê Sûrîye nêwazenî. Ma wazenî Sûrîye demokratîke bikerî. Ma dewlete awan nêkenî; ma hewl danî netewdewlete demokratîke bikerî. Dinya de dewletê ke tewr hêzin î heme federasyon î. Cok ra projeyê ma do nîjadperestî û mezhepperestî orte ra wedarneno.”
ERDOGAN ALTAN/DÎHABER