SERVET KARADUMAN MA / STENBOL
Fuarê Kitaban yê Stenbolî ke emser reya 37. o ke yeno organîzekerdene, dewam keno. Fuar de qasê weşanxaneyanê bînan, weşanxaneyê kurdan zî estî. Weşanxaneyanê kurdan ra Aram, Rupel, Ava, Lîs, Avesta, Ar, Na, J&J û sewbîna fuar de cayê xo girewtî.
Temsîlkaranê weşanxaneyanê kurdan derheqê weşanayîşê kitaban û eleqeyî de qisey kerdî. Koordînatorê weşanxaneyê J&Jyî Azad Zalî da zanayene ke înan emser xeylê kitabê kurdî çap kerdî û wina va: “Prosesê OHALî dezgehê kurdan û weşanxaneyan ser o tesîrêko negatîf viraşto. 10 serranê peyênan de ziwanê kurdî wendoxê xo xelq kerdî. Êdî wendoxî kitabê ke ewnîyayîşê înan akenî, wazenî. Fuar de tewr zaf eleqe kitabanê kurdî rê estî. Wanîyayîşê kitabanê ma hêzêko gird dano ma.”
Edîtorê weşanxaneyê Lîs Firat Fîdanî zî wina va: “Ma bi taybetî kitabê ke edebîyatê dinya ra açarîyayî kurdî, ameyî fuar. Bitaybetî no fuar de nê kitaban rê eleqe zaf o. Kitabê ke qala tarîxê kurdan kenî zî estî û nînan rê zî eleqe esto. No zî ma kêfweş keno.”
Wendoxê kurdî weşananê kalîteyinan wazenî
Edîtorê weşanxaneyê Aramî Ulaş Guldîkenî zî ‘wendox kura de bibo, ma zî ewja de yî’ û wina dewam kerd: “Ma bi nê perspektîfî xebetîyenî. 2 serranê peyênan de nizdîyê 100 kitabê ma ameyî qedexekerdene. Herçiqas ke sansur hende giran o zî ma xebatanê xo domnenî. Reyna zêdebîyayîşê vaya kaxizan zî tesîr keno. Labelê ma reyna zî têkoşînê xo domnenî. Wendoxê kurdî weşananê kalîteyinan wazenî. No zî ma ser o eseranê başan ferz keno.”