Ciwanan vera hêriş û dagîrkerîya dewleta tirkî de 8ê Hezîrane de çalakîya tirsê ganî daybî dest pêkerdene, çalakîya ciwanan roja 20. de dewam kena. Her roje cîya cîya hetî destek danî çalakîya ciwanan.
Şaro ke mintiqeya Meredo ya Qendîlî de cuyenî, çalakgêranê çalakîya tirsê ganî zîyaret kerdî. Wextê zîyaretî de mesajê xoverdayîşî ameyî dayîş. Ciwananê çalakgêran ra Wîlyen Berzencîyî qisey kerd. Berzencîyî va ‘seba ke na cografya ser o tehdîtê dagîrkerîye esto, ma tîya de yî’ û wina domna: “Nê tehdîdî heme qezencanê Kurdistanî hedef gênî. Qendîl ra heta Sine, Mehabad ra heta Silêmanî û Hewlêr, Serhat ra heta Qamişlo, ez veng dana herkesî ke wa hetê gerîlayanê azadîye de ca bigîrî.”
Ser nameyê ciwananê Meredo Soran Alîyî qisey kerd. Alîyî bale ant hêrişê dagîrkerîye ser û wina va: “Hêrişê ke vera Qendîlî de benî, tena vera PKKyî de nê vera heme Kurdistanî de benî. Ma sey şarê Başûrî vanî, ma tîya de yî. Ma senî ke dagîrkerîya şima ya ekonomîke qebul nêkerd û vera ci de boykot da dest pêkerdene. Ma do dagîrkerîya şima ya leşkerî zî qebul nêkerî. Heta ke dagîrkerîye biqedîyo, ma do têkoşîn bidî.”
ANF/QENDÎL