Kurd û dostê kurdan sere de welatanê Ewropa û Rojawanê Kurdîstanî de vejîyayî raşteyan û Komploya Mîyanneteweyî lanet kerdî. Bitaybetî Rojawanê Kurdîstanî de bi hezaran kesî vejîyayî raşteyan û komplo şermizar kerdî.

Serrgêra 20. ya 9ê teşrîna verêna 1998î destpêkê Komploya Mîyanneteweyî de xeylê welatanê Ewropa de yeno çalakîyê şermizarkerdişî ameyî viraştene. Bajaranê Swîsre Fransa û Swêdî de bi çalakîyan komploya 9ê teşrîna verêne ameye şermezar kerdene.

Bajarê Lûzernî yê Swîsre de serrgêra komplo de çadirêke ameye ronayene. Çalakîkeran binê pankartê ‘Ocalan rê azadîye, Kurdîstan rê statu‘ de derheqê tecrîdê Îmrali de vilawek vila kerd û azadîya Ocalanî waşt. Bajarê Montperllîerî yê Fransa de zî bi çalakîyêk komplo ameye şermezar kerdene. Çalakîkeran bale ant muhîmîya Ocalanî ser û da zanayene ke heta azadîya Ocalanî do çalakîyê înan dewam bikerî. Bajarê Marsîlya yê Fransa de zî rayberîya Ciwanên Azad de mîtîngêk ame viraştene. Bi seyan kesî beşdarê mîtîngî bîyî. Çalakîkeran welatê Ewropa ra waşt ke wa vera tecrîdî de bêveng nêmanî.

Paytextê Swêdî Stockholmî de zî rayberîya cinîyanê kurdan de çalakîyêk ameye viraştene. Çalakîkeran komplo û tecrîdê Îmrali şermizar kerd û da zanayene ke heta azadîya Ocalanî do têkoşînê înan bidomîyo. Bajarê Borlange de zî rayberîya Ciwanên Azad de komplo ameye şermezar kerdene. Çalakîkeran dîyar kerd ke Ocalanî planê komplokaran pûç veto û ê zî xeta Rayberê xo de do têkoşînê xo xurt bikerî. Bajarê Gavle de zî bi vengdayîşê Ciwanên Azad xeylê kesî ameyî pêser û bi rayîrraşîyayîşêko meşaleyin komplo ame şermizar kerdene û azadîya Ocalanî ame waştene.

Şarê Efrînî komplo şermizar kerd

Bi hezaran efrînijê ke herêma Şehba de manenî, seba ke serrgêra destpêkê Komploya Mîyanneteweyî protesto bikerî qezaya Ehdasî de ameyî têhet. Kesê ke beşdarê mîtîngî bîyî posterê Rayberê Şarê Kurdî Abdullah Ocalanî û pankartê ke ser o ‘Azadîya Ocalanî temînatê neteweya demokratîke ya’, ‘Şarê Efrînî do sere nêrono’, ‘Şima nêşênî roja ma tarî bikerî’ û sewbîna kiriştî. Çalakîkeran bêmabên siloganê ‘Bê Rayberî cuye nêbena’ eştî. Mîtîng bi deqayêk rêzgirewtişî dest pêkerd û qeydê vengê Ocalanî ame goşdarî kerdene.

Endama Koordînasyonê Kongreya Starî yê Kantonê Efrînî Hêvî Silêmane zî va ‘seba ke projeya neteweya demokratîke asteng bikerî, 32 dewletî mîyanê komplo de ca girewtî’ û wina domnaye: “Komploya lêmine ser ro Rayber Apo ame tepiştene. Nê dewletan nêzanayêne ke tepişîyayîşê Rayber Apoyî do xoverdayîşê şarî zêde bikero. Ma do qet vera komplokaran de sere nêronî. Şorişê Rojawanî şorişê cinîyan o. Seke Rayber Apo zî vano ganî heme cinîyî beşdarê şorişî bibî. Ganî cinîyî muhîmîya şorişî bizanî û têkoşînê xo zêde bikerî.”

Kobanê de zî çalakîye

Hetê TEV-DEMî ra Kobanê de bi siloganê ‘Ma bi ruhê Xoverdayîşê Seserre Komploya Mîyanneteweyî biqedênî, Rayber Apo azade bikerî’ mîtîngêk ame viraştene. bi hezaran kesî beşdarê çalakîye bîyî. Mîtîng raşteyê Şehîd Egîdî ame viraştene û posterê Ocalanî û beyraqê Kongreya Starî ameyî kiriştene. Çalakîye de ame vatene ke yê ke seyyewbînanî û demokrasî wazenî, ganî têkoşînê Ocalanî bidomnî.

 

MERKEZÊ XEBERAN