ZULAL KOÇER / ANF/STENBOL


Tezkereya şerî ke verê cû bi desan reyan Meclîs ra ameybî derbazkerdiş, tewr peynî 2 rojî verê qeraro ke Kombîyayîşê Heyetê Ewleyîya Mîlî de ame girewtiş ra dima Meclîs bi hawayo lez kom bî tezkereya şerî yewna rey ameye derbazkerdiş. Tezkereya şerî vera qerarê viraştişê referandûmo ke Başûrê Kurdistanî de bêro viraştiş de ameye derbazkerdiş. 

Goreyê qerarî tezkere 30ê Teşrîna Verêne de kewena dewre û Meclîs de hetê AKP, CHP û MHPyî ra piştî dîya na tezkere. Tena HDP vera derbazbîyayîşî de vindet. Vera derbazkerdişê tezkereya şerî de partîyê sîyasî, sendîka, hunermend û rêxistinê cinîyan reaksîyon nîşan dayî.

Yê ke reaksîyon nawit ra yewe zî Rexnekerdoxa Edebîyatî Ayşegul Tozerene ya. Tozerene va ‘senî ke ma wazenî herkes vera erdê ma de rêze bigîro, ganî ma zî rêze nîşanê sînoranê welatanê bînan bikerî. Cok ra şer û tezkereyî rê nê. Ti kes nêwazeno domanê xo vînî bikero. Dayîkî wazenî derheqê unîversîte û meslekê domananê xo de bifikiryî. Ez dayîke nîya, ez wazena heme dayîkan ra vaja ‘bibênê yewe’.”


Ma her şert û merc de vera tezkere de yî

Endama Heyetê Caardişî ya Bloka Aştîye Nesrîn Aslane zî dîyar kerde ke ê her şert û merc de vera tezkere de yî û wina domnaye: “No zî nîşanê ma dano ke problemê ke Rojhelato Mîyanên de estî, ameyî qebulkerdiş. Êdî no problem tena problemêko yê cîranî nîyo, problemê zereyî yo. Îqtîdar bi provokekerdişê şerî xo bihêz keno. Ganî herkes nêyî bivîno. Her netewe heqê ci esto ke qederê xo tayîn bikero. Ez no derheq de bitaybetî partîya muxalefetî dawetê raştî kena. Piştîdayîşê tezkereye, piştîdayîşê wedarnayîşê destpironêginayîyan ra xirabêr o. Merg kamcîn het ra beno wa bibo, tewr zaf cinî û dayîkî şar ra tesîr benî.” 


Cinîyî şer nêwazenî

Sereka Pêroyî ya Platformê Ma do Cînayetanê Cinîyan Bivindarnî Gulsum Kave zî va ‘ma zere û teber de aştî wazenî’û wina dewam kerde: “Çimkî cinîyî şer nêwazenî. Cinîyî sey camêrdan nê prosesî ra nêewnîyenî. Prosesanê winasîyan de tewr zaf cinîyî bedelan danî. Cok ra cinîyî do pawitişê aştîye bidomnî. Heme şarî waye û bira yî û ez vera her serre Meclîs ra derbazkerdişê tezkereye de îtîraz kena.” 


Ma vera hemînan de yî

Endama Heyetê Îdareyî yê Odeyê Tabîban yê Stenbolî Încîlay Erdogane zî va ‘ma derheqê şerî de ti munaqeşeyan qebul nêkenî’ û wina qedênaye: “Ma bawer kenî ke heme problemê Rojhelato Mîyanênî bi aştî û demokrasî çareser benî. Cinîyî zî seba nêyî hewl danî. Ma heme çîyê ke derheqê şerî de yî, vera hemînan de yî. Şer yeno manaya rijnayîş û mergî. Helbet ma zî vera şerî de cuye pawenî.”