BERÎTAN SARYA / ANF/ HESEKÊ
Tamara Garabet Sarkîse cinîyêka ke mîyanê tabûrê destpekî yê Armenîyan de ya. Tamara 33 serre ya û dayîka 8 domanan a. Nika ra ver zî tewrê hêzanê pawitişî yê Rojawanî bîya. Tamara destpêkê YXKyî zî bîye, dima tewrê YPG-YPJyî û QSDyî bîye, nika zî Tabûrê Şehîd Nûbar Ozanyanî de ya ke serra 2019î de saz bibi.
Tamara xoverdayîşê Serêkanîyê ser o ANFyî rê qisey kerde. Tamara va ‘serra 2011 de amadekarîya Şorişê Rojawanî dest pêkerd’ û wina dewam kerde: “Ez cinîyêka Armenî ya û o çax tewrê amadekîya Şorişê Rojawanî bîya. Wexto ke şer dest pêkerd ez nêçar menda ke domananê xo keye de biverda û seba pawitişê şarî dest bierza sîlehî. Ez wextêk tewrê YPG-YPJyî bîya. Dima ra embazanê YPGyî ma ra va, ma wazenê taburêkê Armenîyan saz bikerê û ti zî tewrê ci biba. Ez şa bîya ke seba pawitişê şarê ma hêzê pawitişî amayêne sazkerdene. Tabûrê ma derheqê kultur û hunerê Armenîyan de zî xebitîyeno. Labelê senî ke dişmenî 1915 de mîlyon û nîme Armenîyî qetil kerdî, bi nê hewayî reyna hêrişê Ereb, Kurd, Armenîyan kerd.”
Tamara dîyar kerde ke ê zî neçar mendî ke Serêkanîyê ra bivejîyê û wina domnaye: “Artêşa Erdoganî artêşêka gemarine, bêehlaqe û bêwijdanî ya ke cînîye, doman, extîyar û sewbîna herkesî qetil kena. Ma do artêşa Erdoganî çin bikerê. Erdogan bi sîlehanê kîmyewîyan hêriş keno. Gelo çira dewletê dinya bêveng manenê? Ez veng dana şarê dinya ke ma do ser bikewê. Ma sey Kurd, Ereb, Armenî û Suryanî wazenê Sûrîyeya Demokratîke de bicuyî. Ma Tirkan nêwazenê. Ez heme şaran ra vana ke seba şarê Rojawanî biwerzê payan ser û ma hêriş û qirkerdişan bivindarnê.”