Citkarê ke qezaya Hesenkelehî ya Erzîromî ra girêdaye Taxa Koyenderî de kartol û pincarê şekerî resnenî, paweyê xesadî yî. Citkarî vaybîyayîşê mazot, gubre û cereyan ra gerrekar î û dîyar kenî ke ê zirar kenî.
Citkaran ra Suleyman Korucuyî va ‘ma ser serre 50 dolimî erdî ser o kartolan ronayêne’ û wina dewam kerd: “Labelê vaybîyayîşan ver ma nika 5 dolimî de ronenî. Ma toximê kartolan 4 TL ra herînenî, labelê ma kartolan 1 TLyî ra roşenî. Ma heqê keda xo nêgênî. Vaybîyayîşan ver ma nêşênî citkarîye bikerî.”
Îsmaîl Atmacayî zî da zanayene ke verê cû herkes citkar bi û wina va: “Labelê heme çî vay bîyo û nînan ra dima ma kartolan 1 TL ra roşenî. Ma wina beno? Ma zaf zehmetîyan ancenî, labelê qezenç çin o. Verê cû herkes citkarîye kerdêne, labelê êdî herkes hemalîye keno.”
Salîh Tiryakî yo ke kare pincarê şekerî keno, wina va: “Ziwatîye ver berardiş se ra 40 kêmî bîyo. Krîzê ekonomîk ver qezenç nêmendo. Dewa ma de 150 keyeyî estî, labelê 5 kesî pincarê şekerî resnenî. Sewbîna debara ma çin a. Ma mecbûr î bironî. Hukmat 18 serrî yo ke serreyê ma ser o yo. Parlamenter Recep Akdag weçînayîş ra ver ame, tayê sozî dayî, labelê dima ra qet nêame.” Muhammet Tiryakîyî zî dîyar kerd ke ê sozanê AKPyîyan ra eciz î û va ‘Ma do êdî raya xo nêdî înan’.
MA / ERZÎROM