Tarîxnas û nuştox Erdogan Aydinî derheqê weçînayîşê 24ê Hezîrane de qisey kerd. Aydinî wina va: “Tirkîya de tewr zaf elewîyî dejê bindestîye fam kenî. Yê bindestî, mumkin nîyo ke vera bindestanê bînan de bêeleqe bimanî. Yewna weçînayîş de herkes eşkeno destek bido partîya xo, labelê no, weçînayîşêko normal nîyo. Cok ra ganî elewîyî bi tesilî raya xo bidî HDP û ez bawer kena ke do bidî zî.”
Weçînayîşê 24ê Hezîrane rê 3 rojî mendî û xebatê weçînayîşî sere de bajarê Kurdistanî û bajaranê Tirkîya de bi dûştêko berz de dewam kenî. Tarîxnas û nuştox Erdogan Aydinî derheqê weçînayîşê 24ê Hezîrane de qisey kerd.
Aydinî va ‘weçînayîşê 24ê Hezîrane weçînayîşanê Tirkîya yê tewr muhîman ra yo’ û wina domna: “Demêko derg o reya sifteyîne ya ke Tirkîya de weçînayîşêko hêvîdar yeno viraştene. Çimkî ewro neheqî û zextê ke serra 90î reyde yenî muqayese kerdene, benî. Cok ra no weçînayîş zaf muhîm o û no weçînayîş reyde îxtîmalê bedilnayîşê qederê bindest û mexduran esto. Îqtîdar ewro reya sifteyîne kontrolê tayê çîyan vînî kerdo û reya sifteyîne ya ke îslamîst, nîjadperest, neteweperest, kemalîst, sosyalîst, kurd û elewîyî ameyî dûştê pêkerdişî.”
Aydinî dewamê qiseykerdişê xo de wina va: “Îxtîmalêko gird şewa 24ê Hezîrane muxalefet do zafaneyê rayan bigîro û weçînayîşê Serekkomarîye do bimano tura dîyine. No çîyêko şenik nîyo, heta şorişêko şenik o. No eynî wext de seba ameyeyî îmkanê xelqkerdişê hêvîye awan bikero. Eke çîyêko winasî bibo, o wext reya sifteyîne do binkewtişê îqtîdarî bêro dîyayene. No zî do şar de hêvîyêka girde awan bikero. Tena problem gelo ma do bişênbî sindoqan bipawî an nê. Çimkî 24ê Hezîrane ra pey ma do zifqêra xeyal kerdişî de bibî.”
AKP hewl dano ameyeyê Tirkîya tarî bikero
Aydinî qiseykerdişê xo de qala derbazbîyayîşê HDPyî yê bendê weçînayîşî kerd û wina va: “Şertê normalan de HDP bi hawayo asan bendê weçînayîşî derbaz keno, labelê nika îqtîdaro ke her wextî ra zafêr merkezî yo, esto. Îqtîdar heme planê xo goreyê binê bendê weçînayîşî de verdayîşê HDPyî kerdo. Eke HDP bendê weçînayîşî derbaz bikero, o wext merdimî do bi hawayo azade tura dîyine de raye bidî. Estena HDPyî ya meclîsî de do zaf probleman çareser bikera. Raştîya xo de AKP hewl dano HDP binê bendê weçînayîşî de biverdo û bi no hawa ameyeyê Tirkîya tarî keno.”
Raydayîşê HDPyî do vindetişê elewîtîye nîşan bido
Aydinî qiseykerdişê xo de qala problemê elewîyan zî kerd û wina va: “Problemê elewîyan sey problemê kurdan 200 serranê peyênan de nêvîyayo orte, wextê Selçûkîyan, Osmanî û îqtîdarê Abasîyan ra nata dewam keno. Tirkîya de tewr zaf elewîyî dejê bindestî fam kenî. Yê bindestî, mumkin nîyo ke vera bindestîya hetanê bînan de bêeleqe bimanî. Demanê peyênan de parçeyêkê elewîyan netîceyê asîmîlasyonêko giran de hetê dewlete yê çepî de ca gênî. Wa ti kes nizdîbîyayîşê xo nêbedilno, labelê wa bizano ke no weçînayîşêko normal nîyo. Raydayîşê HDPyî do vindetişê elewîtîye nîşan bido. Yewna weçînayîş de herkes eşkeno destek bido partîya xo, labelê no weçînayîş, weçînayîşêko normal nîyo. Parçeyêkê zerrîya mi hetê elewîyan de yo. Ez zaf ser o xebitîyaya. Ganî elewîyî no weçînayîş de bi tesilî raya xo bidî HDP û ez bawer kena ke do bidî zî.”
PÎRHA/STENBOL