Cinîyê ke Zîndanê Xarpêtî de manenî û bi aşman o vera kerdişanê neheqan de vindenî, mektûbe erşawitî. Cinîyan ser nameyê Şerîfe Oruçe mektûbe erşawito û qala neheqîyan kerdî.
Cinîyan mektûbe de vato ‘Ma verê cû kerdişanê kamera, hûmare û çîyanê kêfîyan reyde têrî mendî’ û wina domna: “Ma netîceyê xoverdayîşê xo yê 4 aşman girewt, labelê nika ma prosesêko cîya reyde têrî manenî. Odeyê ma bi 6 kamerayan yenî taqîb kerdene. Wexto ke ma şanî çilayan padenî, vanî ‘kamerayî nêvînenî’ û çilayan bi ma danî akerdene.”
Dewamê mektûbe de wina ameyo vatene: “Tena kamera nê, pacayan ra zî ma taqîb kenî. Seba ke taqîb kenî, ma nêşênî bi hawayo rehet hereket bikerî. Ma na rewşe sey tacîzî şinase kenî. Reyna tayê pacayê ma û hetanê bînan yewbînan ra ewnîyenî, no zî tehluke yo.”
Wa herkes berpirsîyarîya xo bica bîyaro
Cinîyan mektûbe de waştişê xo zî ardî ziwan. Cinîyan waştişê xo wina rêz kerdî: “Wa kamera û pacayî taqîbkerdişî bêrî padayene. Wa cinîyê ke fikrê înan cîya yî, hetê ma ra bîşêrî û herinda ci de hepsîyê ke fikrê ma ra yî, bîyarî tîya. Ma heta nika xeylê neheqîyan reyde têrî mendî û çalakîya ma qasê 4 aşmî dewam kerde. Seba ke reyna eynî çîyî nêrî cuyayene, wa herkes berpirsîyarîya xo bica bîyaro.”
ANF/BRUKSEL