Cenazeyê parêzvan Mam Zekî, Mahir Serhed ku pêr li nexweşxaneya lê dihat dermankirin, şehîd bû, bi merasîmekê li Şengalê hate veşartin. Dewleta Tirk a dagirker di 15’ê Tebaxê de li dijî Şengalê êrişa hewayî pêk anîbû û di êrişê de Endamê Koordînasyona Civaka Êzîdî Zekî Şengalî şehîd bû û parêzvanê wî Mahir Serhed jî bi giranî birîndar bûbû. Pêr Mahir Serhed li nexweşxaneya lê dihat dermankirin, şehîd bû. Ji bo Mahir Serhad merasîmeke eskeri hate lidarxistin û bi karwanekî dirêj ber bi şehîdgeha Xanesorê ve birin û li Şehîdgeha Şehîd Dilgeş û Şehîd Berxwedan ji aliyê bi hezaran kesî ve hate pêşwazîkirin. Berdêla wê çi dibe… Di merasîmê de ji Fermandarên YBŞ-YJŞ’ê Viyan Hebabî axivî û got; “Hevrê Mahir ji destpêkê ve ji bo civaka Êzîdî xizmetê dike. Ev li vir ji dijmin re dibêjin, piştî her êrişekê em ê hîn bi rêxistin û bihêztir bibin. Em ê xeyalên hevrêyên şehîd pêk bînin. Berdêla wê çi dibe bila bibe, em ê xeyalên Mam Zekî û şagirtê wî Mahir Serhad ên Şengala xweser pêk bînin.” Li ser navê TAJÊ, Şemê Remo jî got; “Divê hemû civaka Êzîdî bibe yek. Tifaqa xwe çêke. Ji ber ku Mam Zekî û yên li pey wî ji bo vê têkoşîn kirin û ev xak bi xwîna xwe av dan. Heya em sax bin em ê li ser rêya şehîdên xwe bimeşin.” Piştî axaftinan cenazeye Şehîd Mahir Serhad bi dirûşmeyên ‘Şehîd Namirin’, ‘Bê Serok Jiyan Nabe’ û ‘Bijî serok Apo’ hate spartina axê. ŞENGAL