Ramazan Kaplan binameyê silasnayî Celal Hoca serra 1956 de qezaya Çinarî ya Amedî de yeno dinya û mektebo sifteyîn Bismil de, mektebê mamostayî zî Erganî de waneno û dima ra Enstîtuya Perwerdeyî yê Amedî de dewam keno. Kaplan rojnuşteyê xo de wina qala cuyayîşê xo keno: “Doza gonîye ver 1960 de pîyê mi û 10 serrî ra dima zî apê mi ame kiştiş. Seba ke her di zî merdbî, berpirsîyarîye kewtbî milê kekoyê mi ser. Seba ke kekoyê mi zî şofêr bî û her tim kar nêkewtêne destê ci, ez mecbur menda bixebetîya. Ez 9 serran ocaxê tuxla de xebetîyaya. Serra 1976 de ez dewa Stewrêya Mêrdînî de bîya mamosta, la dima ra ameya dûrîvistiş.”
1977 de PKK silasna
Kaplan serra 1970 de bi DDKD cuyayîşê şorişgerî şinasneno. Dima ra ‘Kawacî’yan reyde têkilî roneno û roja sifteyîn ra nata mîyanê dewij û karkeran de sey rayber yeno qebulkerdiş. Labelê Kaplan fam keno ke bi nê rêxistinan şoriş nêbeno û serra 1977 de Tevgerê Azadîye yê Kurdan ke o wext sey ‘Grûba Apocîyan’ ameyêne şinasnayîş, nas keno. Kaplan badê ke rewşa îstîsnaî yena îlankerdiş, serra 1979 de vîyareno Semsûr. Xususîyeto tewr baş yê Kaplanî no yo ke Kaplan, heme çalakîyan de tewr vernî de ca gêno. Kaplan mîlîtanîya xo vera hêzê feodal û kompradoran de nîşan dano û bi taybetî xoverdayîşo ke Sêwregi de vera eşîra Bucakan de yeno nîşandayîş, o zî Semsûr de xoverdayîşî domneno. Wexto ke derbeya leşkerî ya 1980 bena, Kaplan derbazî Lubnan beno û serranê 80-82 de bi hawayo aktîf beşdarê ‘xebatê perwerdeyê kadroyan’ beno. Reyna Kaplan Konferansê 1. û Kongreya 2. de sey delege beşdar beno û dima ra herêma Rojawan û Lubnanî de xebate keno. Kongreya 2. ra pey bi Endamê Komîteya Merkezî yê PKKyî Mehmet Karasungurî reyde derbazî Kurdistanê Rojhelat û Başûrî beno û nê cayan de xebatan keno. Serra 1984, aşma gulane de grûbeka girdî reyde derbazî herêma Bedlîs û Şêrwan beno û sekreterîya na herême zî keno. 15ê tebaxe 1984 ra pey na herême de ‘têkoşînê bisîleh’ dano destpêkerdiş.
Beno sembol
Serra 85 de hêzê dewlete bi hûmarêka gird operasyon danî destpêkerdiş û Kaplan bi grûbeka şenik ya gerîlayan derbeyê girdan dano hêzê dewlete ro. No operasyonî de embazê ci şehîd benî û Kaplan zî bi hawayo giran birîndar yeno tepiştiş. Wextê îfadedayîşî de seba ke çeneyê xo ra birîndar bîyo, nêşkeno qisey bikero. Wexto ke serwanê leşkerê tirkan kaxiz û qeleme ey ver de roneno, Kaplan kaxiz de wina nuseno: “Şima bi hawayo veng hewl danî, ez do qisey nêkera, ez do xover bidera.’ Kaplan her çiqas ke îşkenceyanê girdî vîneno zî qisey nêkeno û bi xoverdayîşê xo beno sembol. Şehadetê ci ra 30 serrî dima rojnuşteyê ci herêma Bedlîs û Şêrwan de hetê gerîlayan ra yeno vînayîş.
BAHOZ AMED / ANF / BEHDÎNAN