Merasîma vîrarden Camî ya Şêx Seîd yê Marsîl ya de virazîya û bi seyan Kurdistanijî tewr bî. Badê vinderdişê hurmet Mele Necmeddîn qiseyê akerden kerd û hay ant qetlîamanê verra kurdan ser. Mele’yî vist vîrî ke kurdan ti wext vera zilm, qetlîam û zorvajîyan milê xo çewt nêkerdo û kurdanê ke Awrûpa de cuwyenê ra waşt ke dûştê qetlîaman de temaşekar nêmanê.
Xoverdayiş mîrasê Şêx Seîd o
Peycoy Koma Beytbeja bi kurdî û tirkî îlahî û helbestî wend. Federasyonê Alewîyê Demokratîk yê Awrûpa zî jû mesaj ruşt, Şêx Seîd û alwozê ci vîrard.
Parlamenterê HDP yê Çewlig Hişyar Ozsoy zî bi vîrardişê Şêx Seîd û alwozanê ci destpa qiseyanê xo kerd. Ozsoy’î vist vîrî ke verra kurdan tarîx ra heta na roj qetlîamî ramenê û hina dewam kerd: “Ereb, pers, tirkan kurdan qetil kerd. Çîyê ke bi îslamîyet ra eleqedar nîyê kerdî. Mezelxaneyê ma nimitî. Vatî eke bê mezel bimanê, tesîr ci qedîyenê. Na salon ra zî ayseno ke, hezaran kîlometre dûr de bê zî tornê ci pey Şêx Seîdî de şinê.” Ozsoy’î va, xoverdayişê ewro mîrasê Serwedarnayîşê Şêx Seîd o û waşt ke herkes tewrê xoverdayişî bibo.
ANF/MARSÎLYA