Sekreterê Egîtîm Senî yê Şûbeyê Tekîrdagî Kazim Unlu bi Qerarnameyê Hukmê Qanûnî de kar ra ame îxraçkerdene, krîzê qelbî derbaz kerdbi, 23ê teşrîna peyêna 2017î de wefat kerdbi. Şaredarîya Mazgêrdî seba vîrardişê Unluyî qeza de kitabxaneyêk akeno.
Xebatkaran şaredarîye Pelîn Gungorene va ‘xebatê akerdişê kitabxaneyî 2 aşmî dewam kerd’ û wina domnaye: “Ma xeylê bajaran ra kitabî ardî. Ma waşt nameyê Unluyî kitabxaneyêkî reyde bidî cuyayene. Kazım Unlu vengê kedkaran bi. Ma bawer kenî ke şarê ma hîna zaf biwano û xo zana bikero.”
Gungorene daye zanayene ke şarê Dêrsimî cigêrayîş û ilmî ra zaf hes keno û wina dewam kerde: “Cok ra Dêrsim hetê wendişê kitaban de Tirkîya de rêza 1. de yo. Ma felsefeya ‘her kitabêk merdimêk o’ esas gênî. Her kitabêk yeno manaya bi hezaran merdim û fikrê cîyayî. Mazgêr de merdimî tay ê, kitabî hîna zaf î.”
MA / DÊRSIM