Vizêr roniştişo yewin yê mehkemeya ke Hemserekê HDPyî Selahattîn Demîrtaş tira tewqîfbîyaye yo, Mehkemeya Cezaya Girane ya 19. de, Kampusê Zîndanê Sîncanî de ame dîyayîş.
Ewil 20 kesî girîyayî salone, badê avûkatan îtîraz kerd û 120 kesî girîyayî. Heyetê xerîbî nêgirîyayî mehkeme. Bi seyan kesî herçiqas ke hewa serdbî zî, teber de vindetî. Rojnamegerê ke kartê înan yê zerdî çinêbî, nêgirîyayî mehkeme. Labelê mehkemeya teşebusê derbe de rojnamegerî bi telefon û compîturan kewtî zere. Muxabîrê Ajansê Mezopotamya bi emro taybetin nêgirîyayî zere.
Demîrtaşî seba ke beşdarê mehkeme bibo waştişname da û waşt ke bi hawayo SEGBÎS nê, raşteraşt beşdarê mehkeme bibo. Xora Demîrtaşî dozêka bîne de zî herinda SEGBÎSî waştbî ke beşdarê mehkeme bibo, labelê wexto ke hewl dabî kelepçe bidî destê ci ro, red kerdbî û beşdarê mehkeme nêbîbî.
Wa qeraranê cesuran bidî
Destpêkê mehkeme de dozgerî waşt ke wa tewqîfbîyayeyîya Demîrtaşî bidomîyo. Babete ser o avûkatê Demîrtaşî dest bi pawitişî kerdî. Avûkatan ra Mahsunî Kahramanî va ‘heta çend rojî verê zî Demîrtaşî nêzanayêne ke do kamcîn mehkeme de bêro mehkemekerdiş’ û wina dewam kerd: “No tarîx de çîyêko sifteyîn o.”
Avûkat Ercan Kanarî zî dîyar kerd ke ganî ê bişînî raştîyan bivajî û wina va: “Eke tayê faktorê sîyasî bîyî sebebê tehqîqatî, no jan o. Ganî qerarê ke nêbî şûrê îqtîdarî bêrî dayîş. Ma mehkeme ra wazenî ke wa qeraranê cesuran bidî. Nê kerdişê huqûqê dişmenî yî.”
Avûkate Yildiz Îmreke zî arde ziwan ke heme fezlekeyê ke derheqê muwekkîlê mi de ameyî amadekerdiş, goreyê fikrê ci yê sîyasî ameyî akerdiş.
MA/ANQARA