Verba na zîhnîyete zî Komeleya Ekolojîyê ya Mezopotamyaye bi îdiaya xebatê ekolojîyê tena di yew cayê de sînor nêkerdiş, di demo vîyarteyî de tena ser komeleye xebatê ekolojîyê nêkerdişî û êdî bi silgerîya meclîsê taxani şarî ra resayişî û şarê reyde xebatkerdişê û bi no rayîrî zî hişmendîya ekolojîyê averberdişî biryarê meclîsêbîyîşê girewt.
Peynî biryarê zî Meclîsê Ekolojîyê komîsyonan rona, bi komîsyonan zî êdî tena yew babete ekolojîyê ser xebat nîno kerdiş. Hewna peynîya biryarê meclîsêbîyîşê Meclîsê Ekolojî ya Amed her hewta kombîyayişê xo yew meclîsê taxe de viraznea. Nê kombîyayişan ra endamê meclîsê ya şarê elaqayê zaf bi gird mojnenê û peynîya nê kombîyayişan zî meclîsê taxe zî di mîyanê xo de komîsyona ekolojîyê saz kerdî.
Xizmetanê dare
Tewr peynî kombîyayişê xo ya 6’ine Meclîsê Ekolojîyê ya Amede di Meclîsê Şarî ya Musa Anterî viraşt. Kombîyayişê ra 25 endamê koordînasyona Meclîsê Ekolojîyê û taxijî beşdar bîyê. Moderatorîyê kombîyayişê Nîhat Kiratli viraşt. Di kombîyayişê rojdemê perwerdeyê ekolojîyê, newe înşakerdişê Kobanêye, rewşa ocaxê qumî, xizmetanê dare û beşdarbîyîşê berpirsîyarê meclîsê taxe ser nîqaş ame kerdiş.
Hewna di kombîyayişê de ame vatiş ke do Tevgera Ciwanê verba viraştişê bendaw û HESan di Kerboran Mêrdîne de çalakîye dar bivisna, çarçiweya çalakîye zî ciwanan sifteyin raşteyê bendawe ra bimeşî û peynî zî kone saz bikerî û di kone de zî ser xebatê ekolojîyê ciwanan panel, tereqnayiş û sewbî çalakîyan do bivirazî.
NAVENDA XEBERAN