Med Tv cirê bibî derd, hama melemê na derdî nêdî. Yanê kurdî bêvengî nêmendî. Med Tv 1999 ame guretene dima Medya Tv ame. Onca cirê derd peyda bî.
Na raye zî AKaPe kewte dewre, wast Medya Tv bêro guretene. Seweta naye pêro îmkanê Tirkiya dugelanê bînan rê peşkeş kerdî. Torve de mîlyonî dugele bi dugele feteliye AKaPe.
Risfet da, Tirkiya rote Medya TV da guretene. Tansu xanime ra derse nêguretî bî.
Tabî çiye hesav nêkerdî bî. Demode kilmek hukumato tirk bî sa. Hen zona ke kewto ser. Peyê xo de niyanêda, vireniya xo nêdiye.
Yanê marê mesela kurdî halkerdenê! Sene mesela halkerdenê hata ewro keşî famnêkerdo.
Xorê ebi name TRT6 jû televîzyon naro, vat ‘ma heqanê kurdam dame ci.’ Heto bîn ra nêverda kurdî gorê xo televîzyon virazê. Armancê xo heqa kurdan cidayene nêbiye, propaxanda xo bi kurdî kerdene biye.
Medya Tv ceriya, se bî?
Jû dugela Avrupa pere û îhaleyî guretî, lîsansa televziyonê Medya derg nêkerde.
Serre 2004 biye.
Onca aynî serre Roj TV ame ronayene. Hata nî rozanê peyenan weşanê xo kerd. Tabî eke Tirkiya dest de biyenê, qeyta desture nêdenê. Perê ke kerdî vila, awa deru berdi.
Mezgê sermîyananê tirkan hona zî famnêkerdo. Siyasetvanê tirkî nêwazenê fambikerê ke waxt vuriyo, waxtê texnolojiy o, îmkanî herke sonê benê hîra, teng nêbenê.
Famnêkenêke heqa kurdan ci de û na derd ra bixeleşiyê.
Hata ke mesela halnêbiya, kes nêşîkîno vengê kurdan bibirno.
Na mesela gune binge ra bêro halkerdene. Yê tirkan kamij heqê xo ke estê, yê kurdan zî nî heqê xo estê. Kamo ke wazeno serbest û têdust biciwiyo, nî heqanê xora nêtexelîno.
Ebi zordestiye kes xayîs nêbeno û vengê xo nêbirneno.
Dewlet û hukumatê tirkî se kenê, bikerê, kurdî na sate ra tepiya bê televîzyon nêmanenê.
Naye gune herkes bizono.
Dewlet û hukumatanê tirkî ma çever ra kerdîme tever, ma lozine ra kewtîme zerre. Nika ma onca kerdîme tever, na raye ma onca çever ra kume zerre.