Her Kurdê Bakur wexto ke, ser wendiş qise keno, vano, “Ez hewe ewîl şîya mekteb mi Tirkî nêzananê.

Ez mektebê de Tirkî musawa. Malimê ma nêverdenê ma Kurdî qisebiker. Mîyanê ma de sîxur viraştenê, kam ke Kurdî qise bikerenê, nê sîxuran gera înan kerdenê”.
Tay û zaf herkes eynî qise keno. La aye kî hina zaf qise kenî, hema hema pêronê înan nika hetê ciwîyayîş de zê Tirk ciwîyenî û hetta ruhê înan bîyo ruhê Tirk. Hem hina qise kenî û hem zî Tirkbîyayîş qebûl kenî. Hezim kenî.
Nika ra  pê hina qisekerdiş qet û qet pere nîkeno.
Kam ke, nê çîyan bizano û ser nê çîyan qise bikero, la derheqê ziwanê Kurdî de renc nîkero, karê veng keno.
Kam ke, nê qiseyan bikero, dima ra şîyero mektebê Tirk, hîzmetê Tirkbîyayîş keno.
Kam ke, nê qiseyan bikero, reyna tutanê xo bero teslîm mektebê Tirk bikero, zurrîyetê xo qirkeno.
Kam ke, nê qiseyan bikero, reyna pê ziwanêTirkî qisekerdiş bikero, welatparêzîya eyê welatparêzî nîya.
Welatparêzîya hina, welatparêzîya Tirkperêstîya.
Bena tayî kes xo eciz bikerenê, la raştîyekîya.
Bena tayî kes xo eciz bikerenê, la  heqê înan çîna ke eciz bibenê.
Gera şerm bikerenê. Gera fikir bikerenê.
Çira, pê ziwanê dagirker û îstîlaker ciwîyenî?
Çira, pê destê xo tutanê xo teslîmê dewlata Tirk kenî, vanî ha tutanê ma bikerenê Tirk?
La Kurdê ke, mektebê Tirk de malimî kenî yew înan ra se vajo?
Sucê en gird eyê kenî. Sucê înan gorê sucê korucîyan hîna xirabo.
Pê  destê xo, pê mezgê xo, tut u qijanê Kurd kenî Tirk.
No sucê qirkerdişo.  Tayî malimê hina heta teqawit-emegdar- benî, pê ziwanî Tirkî qijanê Kurdan perwerde kenî. Wexto ke teqawit benî şinî, vanî ma welatparêzî û Kurdî-Der de destpêkarê ziwanê Kurdî kenî.
Tena kemayî nayê niyê. Kemayê şarê Kurd zafo.  Hetê ziwan û kultur xo de zêde eleqedar nîyê. Hina şîyero û ê şarê Kurd qirbibo.
Yew dayî û baw seyî qijanê xo şiravenî mektebê Tirk?  Pê ziwan û zîhnîyetê dagirker û îstîlaker mekteb wendiş averşîyayîş nîyo.
Pê ziwan û zîhnîyetê dagirker û îstîlaker mekteb wendiş, eslê xo înkarkerdişo. Tirkbîyayîş qebûl kerdişo.
Ha biewnê mektebê Tirk yenî boykotkerdiş. Reyna tayî day û bawê Kurd, qijanê xo şiravenî mektebê Tirk.
Hina seyî beno?
Yew Kurd seyî beno dişmenê xo?
Vanî ya:”Dinya pêro dişmenê zerancîyo, zeranc zî dişmenê xo yo”.
Wa no vatiş, nîbibo qederê Kurdan.
Gera Kurd, kîyan de, mekteban de, cayê kar de, bajeran de, dewan de, kuçeyan de, Kurdîstan de, teberê Kurdîstan de heme ca de pêro çiyê dişmen ra fek verebidenê.
Mektebê inan ra fek verebidenê.
Kurdî fikir bikerê.
Kurdî qise bikerê.
Kurdî bi nusnê.
Kurdî bi wenê.
Çûnkî  zê verênan ma vato, “Duayê kutikan qebûl bibîyê ê asmên ra aste bivaranê”.
Bi vinderdişê çîyek nêkewno destê Kurdan. Ziwanê Kurdî xelas nêbeno. Aver nîşino.
Tena pê meş û çalakiyan, dazanayîşan ziwanê ma xelas nêbeno.
Pê boykot kerdişê mektebê Tirk, serkewtişa yewin bena.
Serkewtişa dîyin zî, bi Kurdî fikirkerdiş, qisekerdiş, nuştiş û wendişo.