Hukmatê AKPyî vera kurdan de konseptê hêriş û şerî xebetneno. Çarçewaya nê konseptî de tena Kurdistan û Tirkîya de nê, Ewropa de zî hetê faşîstî vera kurdan de yenî sûrkerdiş û hêrişê faşîzanî yenî organîzkerdiş.
Çend aşmî verê wexto ke Erdogan vernîya Qesra Sipî ya Amerîka de bî, vernîya kamerayan de emir dabî pawitoxanê xo û pawitoxê ci zî hêrişê kurdan kerdbîy.
Ame musayîş ke şanê 1ê êlule de bajarê Pforzheîmî yê Almanya de camîyê kurdan raştê hêrişê grûbêka faşîste ya ke hetê îqtîdarê Erdoganî ra ameybî rêxistinekerdiş ameybî. Herçiqas ke hêrişî ser ra 4 rojî derbaz bîyî, reyna zî heta nika polîsî şopa kesê ke hêrişê camîyî kerdî û zirar dayî camîyî nêdîyo.
Wextê hêrişî de grûba faşîste mîyanê camîyî serûbin kerda û heme çîyan parçe kerdî. Çîyê ke ameybî parçekerdiş mîyan de Quranê Kerîm zî esto. Ame dîyayîş ke wextê hêrişî de grûba faşîste xeylê Quranê ke kitabxaneyê camîyî de bîy, parçe kerdî.
Ti îdarekar camîyî zîyaret nêkerd
Endamê cematê camîyo ke raştê hêrişî ameyo, Abdullah Mutluyî va ‘camî serra 1997î ra nata xizmetê dînî dano’ û wina dewam kerd: “Reya sifteyîn a ke camîyê ma hêrişêko winasî reyde rî bi rî maneno.”
Îdarekarê camîyî zî dîyar kerdî ke no camî seba kurdan xizmet dayêne û herçiqas ke heta nika 4 rojî zî ser ra derbaz bîyî, reyna zî ti îdarekarê bajarî camîyî zîyaret nêkerdo.
Bajarê Pforzheîmo ke mîyanê eyaletê Baden û Wuttembergî de ca gêno û 45 km dûrîyê bajarê Stuttgartî yo de xeylê kurdistanîyê cuyenî. Camîyê Selahaddîn Eyyubîyî zî Komeleya Kulturê Kurdan reyde eynî bîna de yo.
PFORZHEÎM - ANF