Penîr Vakurê Kurdîstanî de tena çîyo ke arayîye de yeno werdene nîyo, eynî wext de mîrasêko kulturî yo zî. Labelê roja ma ya ewroyî de heywankarîye her ke şona mirena. Reyna vaya simêr û êmî zî zêde bena û no hêzê herînayîşê merdiman ser o tesîr keno. Wina beno ke kesê ke heywanan miqate kenî, mecbûr manenî heywananê xo bîşêrî selexaneyan.
Emser seba ke şit tay bi, vaya penîrî se ra 20 zêde bi. Rotox û koçerê ke penîr virazenî zî nê zêdebîyayîşî ra tesîr bîyî. Aşma Hezîrane de penîr kîloyê ci 24 TL bi, labelê Tebaxe de bîyo 30 TL. Tena şit û penîr nê, mast zî vaya ci zêde bîyo.
Keyeyê Yavûzî ke her serre heywananê xo Sêrt ra seba çerênayîşî benî Bidlîs, ewja de penîr virazenî. Ayşe Yavûze qala merhaleyanê viraştişê penîrî kena û dîyar kena ke sey verê ma nêşênî bi penîrî debara xo bikerî û wina dewam kerde: “Êm vay o û ma mecbûr mendî ke 5 mangayanê xo biroşî. Seba ke şit tay bi, vaya penîrî zêde bî. Merdimî nêwazenî ke biwerî.” Lajê Ayşe Yavûze Kadîr Yavûzî zî va ‘vaybîyayîş cuya merdiman asteng keno’ û dîyar kerd ke labelê seba ke sewbîna alternatîfê ma çin o, ê nêşênî sewbîna kar bikerî.
Esnafê ke Stenbol de penîr roşenî zî vaybîyayîşê penîrî ra gerre kenî û danî zanayene ke zêdebîyayîşê vayan roşîyayîşê ci ser o zî tesîr keno.
ANF / BIDLÎS