Kurdê ke Ewropa de ciwîyenê, seba protestokerdişê hêrişanê ve Şengal û statuyê êzidîyan sûka Almanya Dusseldorfê ra ver bi Brukselî meşîyenî. Babete ser o Serekê Meclîsê Dîaspora yê Şengalî Fîkret Îgrek û hunermenda êzidî Amele qisey kerdî.
Îgrekî qiseykerdişê xo de qala hedefê meşîyayîşî kerd û wina va: “Çalakîya ma Dusseldorf de 20ê adare de dest pêkerde. Ma derheqê hêriş û polîtîkayê lîşinan de dosyayêk amade kerd. Ma do 27ê adare de vera Konseyê Ewropa de mîtîng bivirazî û ma do saet 13.00 ya zî 14.00 de dosyaya xo pêşkeşê heyetî bikerî. Hêrişê nikayîn dewamê hêrişê 3ê tebaxe 2014î. DAIŞ tena aktor o. Peynîya nê planan de AKP esto. PDK zî hemparê AKPyî yo. Hêzê ke hêrişê Şengal û Minbicî kenî DAIŞ, AKP û PKD bi xo yî.”
Şervanî ma pawenî
Amele zî qiseykerdişê xo de va ‘ma do Dusseldorf ra heta Brukselî bimeşî, hedefê ma vindarnayîşê qirkerdişan û statu girewtişê êzidîyan o’ û wina dewam kerde: “Tarîx ra nata êzidîyî qirkerdişî reyde rî bi rî manenî. Her çiqas ke hêrişî bibî zî şervanê ma êzidîyan pawenî. Ez şehîdan ver xeylê hîsin a. Ma piştîdayîşê PDKyî şermizar kenî. Şarê ma piştî dano ma û ma tena nêverdano. Cok ra ma zaf kêfweş î.”
BRUKSEL