Dêrsim de bi des hezaran kesan hêriş protesto kerd. Protestokerdoxan Kuçeya Hunerî ra ver bi Meydanê Azadîye şîyê. Çalakîye de parlamenterê HDP Edîbe Şahîn û Alîcan Onlu, hemserekê şaredarîye Nurhayat Altun û Mehmet Alî Bul, serekê şaredarîyanê qezayan û rêxistinanê bînan ê sîyasîyan ra xeylê temsîlkaran cayê xo girewtbî. Esnafî kepenkê xo padayî. Protestoyî de dirûşmeyî zey “Qetile DAIŞ, hemkare AKP”, “Şên bo şorişê Rojawanî” û “DAIŞ kişena, AKP seveknena” ameyî eştene.
Amed, Colemêrg, Şirnex, Sêrt, Bismil û Farqîn de zî kurdan hêrişê Pirsûsî protesto kerd. Riha de mabênê protestokerdox û polîsan de pêrodayîş vejîya, polîs bi gaz û awe hêriş kerd. Sey netîce, walîyîye pêro kombîyayîş û nûmayîşî qedexe kerdî. Şaristananê Tirkîya û Ewropa de ke tede kurdî ciwîyenê, uca de zî protestoyî organîze benê. Bi seyan kesî hêrişî şermezar kenê.
DAIŞê qetilkar
Partîyanê sîyasîyan zî xeberî weşanayî ke tede hêriş bi giranî şermezar kenê. Hemserekê HDP bi heyetêk ewro saeta 19:00 de şono Pirsûs de dirbetan zîyaret bikero. Verê, Demîrtaş û hemsereke Fîden Yuksekdag pîya yew aşkera dabî, tede vatbî HDP do tedbîranê xo yê asayîşî bigîro. Demîrtaşî wina vatbî: “Heya, no serebûtêke zaf dejdaye yo, teberê însanîye der o, ma ver bi qetlîamêke wehşî û barbarkî der î. 32 ciwanê ma yê zem-zelalî, zafê înan wendekarê zanîngeh, wendekarê tib, huqiq, komelnasî, psîkolojî bîyê. No dej zaf gird o la ez ney şima ra vana; netîceyê ke qetlîamî ra dime yenê dîyene û hêrişê ke ver bi partîya ma yenê kerdene, ê kî sey nê qetlîamî dej danê,”
KCKî zî bertekê gird nîşan da
Hetê bîn Cemîl Bayik û Hemserekê Konseya Rayverî yê KCK ra zî hêriş şermezar kerdbî. Bayikî vat bi ke; “No hêriş, hêrişê AKP û DAIŞî ya muşterek o. AKP ya ke DAIŞ weye kerda arda nê halê ke bîyê naxirê qetilan. Qetlîamê Pirsûsî ke duştê ciwanê şarê ma de ame kerdene, hêrişo muşterek ê AKP û DAIŞ o. No hêriş beno mehneya AKP ke Rojawan de mintiqaya tamponî bivirazo. Gerek kurdî xo rê yew pergala xopawitîşî ke ver bi nê tewir qetlîaman de bivejîyê.”
NAVENDA XEBERAN