ARJÎN DÎLEK ONCEL / MA/AMED
Saya grevê vêşanîye û rojeyê mergî yê Hemsereka Kongreya Komelê Demokratîke Leyla Guvene û bi hezaran hepsîyan de pêvînayîşê avûkatan bi Rayberê Şarê Kurdî Abdullah Ocalanî reyde destpêkerdbî. Labelê 18ê Hezîrane ra nata yo ke reyna tecrîd dewam keno.
Parlamentera HDPyî ya Riha Ayşe Surucu derheqê tecrîdî de qisey kerde. Surucu dîyar kerde ke Ocalan Tirkîya û Rojhelato Mîyanên de temînatê aştîye yo û wina dewam kerde: “Wextê grevan de 8 embazanê ma xo feda kerdî. Saya înan de berê pêvînayîşan abi. Labelê 2 aşmî yo ke reyna tecrîd esto. Birêz Ocalan tena şexsêkî nîyo. Wexto ke muzakere dest pêkerd, Tirkîya de zaf çîyî bedilîyayî. O wext ma bîyî şahid ke Ocalan muxatabê aştîye yo.”
Surucu daye zanayene ke eke fikirê Ocalanî bi hawayo asan biresî şarî, o wext ewnîyayîşê cinîyan yê camêrdan zî bedilîyeno û wina va: “Paradîgmaya Birêz Ocalanî azadîya cinîye ser o ya. Coka Birêz Ocalan vano ‘cuye bi cinîye dest pêkerda’. Eke tecrîd wedarîyo, tedaya ke cinîyan ser o esta zî do wedarîyo. Do vernîya cinîyan biabo. Ma baş zanî ke mesajê Birêz Ocalanî hêz dano cinîyan û cinîyî hîna bi xurtî eşkenî vera zîhnîyetê camêrdî de têkoşîn bidî. Fikrê Ocalanî hêz dano Kurdan zî. Kurdî bi nê hêzî payan ser o vindenî. Sebebê tewr gird yê tecrîdî zî no yo.”