RÛKEN DEMÎR / MA / AMED
Bi nameyê Salih Tekînî de keso ke seba wedarnayîşê tecrîdê serê Rayberê Şarê Kurdî Abdullah Ocalanî, parlamentere Dersîm Dage reyde dest bi grevê vêşanîye kerd û tewqîf bi, 5ê Nîsane de tehlîye bibi. Tekînî çalakîya xo keye de temam kerde.
Tekînî mîyanê 85 rojan de 13 kîloyî kêmî kerdî. Tekînî badê ke Ocalanî mesajê erşwait, çalakîya xo qedênaye. Tekîn çalakîye ra dima neqlê nêweşxaneyî bi û nika zî taburcu bi. Tekîno ke nika goreyê programê miqatebîyayîşî yê doktoran tedawîya xo domneno, derheqê xoverdayîşî de qisey kerd.
Tekînî va ‘mesajê Ocalanî seba ma zaf bi mana yo’ û wina domna: “Perspektîfê çareserîye yê Ocalanî azadîyanê heme şaran esas gêno. Vatişê ci yê ‘esil nika ra pey ez hêvî kena ke şima mi reyde hereket bikerî’ raştîya 21 serrî hucreyê yew kesî de goreyê şarî hereket kerdişî îfade keno. Yê ke Rojhelato Mîyanên de azadî û demokrasî esas gênî, ganî fikranê Ocalanî bieşnawî û goreyê ci hereket bikerî.”
Tekînî dewamê qiseykerdişê xo de wina va: “Rojhelato Mîyanên û Tirkîya de êdî hilm nîno girewtene û blokê faşîstî hakim î. Ocalanî waşt ke wa problemê Sûrîye pêrodayîş ra dûrî, bi temînatê qanûnê bingeyênî de bêro çareserkerdene û goreyê hesasîyetê Tirkîya bêro hereketkerdene. Mesajê Ocalanî ra dima xitimîyayîşê Rojhelatê Mîyanênî abi. Pawitişê aştî û erjê demokratîke berpirsîyarîya herkesî de yo. Ganî mesaj baş bêro famkerdene û herkes wayîrê mesajî bivejîyo. Çimkî pawitişê aştîye deynê vileyê herkesî yo. Na çarçewa de têkoşînê ma do bidomîyo. Ma seba ke bişînbî erjanê demokratîkan cuye de pratîze bikerî, têkoşînê xo bidomnî.”