“Na salona mahkeme de şexs dê ma de pêrokîn şar yeno mahkeme kerdin. Wazenê no şarî çinî bikerê. Şima wazenê ma biqedînê. La ma dê destûr nêdê ke şima şexs dê ma de partiya ma û şarê ma tesfiye bikerê. Ma dê veyşan û teyşan bimanê, îşkence bivînê, xo feda bikerê la ma dê no emelê şima rê destûr nêdê. Verra polîtîkayanê şima yê qirkerdin, verra pêrokîn zext û zorvajiyan ez bê şert nûmayişê rojeyê merdiş îlan kena. Bi no nûmayişî ma îxaneto ke şima kamiya ma ya polîtîk û Kurdatiya ma rê ferz kenê, ma protesto kenê. Peynî de wazena nayî vaja; wayirvetişê na dawa deynê merdimîyo”
Bi nê vatişan Rayveranê hereketa serbestî yê Kurdî ra M. Xeyrî Durmuş salonê mahkemeyê faşîzmî de îlanê nûmayişê girdî kerd. Rojan ra jû roja germ yê amnanî bi. Dewleta zilimkar waşt girotxaneyan de hereketê serbestî yê Kurd biqedîno. Serva-qandê nay her zilm û zorvajî kerd. Îşkenceyê ke nînê aqilê kesî şoreşgeranê Kurdî ra kerd. Tenya jû ray virada, raya îxanet. Destê şoreşgeran de zî tenya jû ray estbî, raya xoverdayiş. Derbeya sifteyîn Mazlûm Doğan’î vist generalanê îşkencekerdoxan. Pey coy Ferhat Kurtay, Necmi Öner, Mahmut Zengin, Eşref Anyık’î verra teslîmbiyîn û îxanet ganê xo day ver adir. Generalanê dewleta zilimkar verra nê nûmayişan cemidiya, tersiya û îşkenceyê xo hewna kerd vêşî. Bado ke nûmayişê 14’ê Tîrmehî destpa kerd, generalê îşkencekerdox yê dewlet serva-semedê no nûmayişî tesfiye bikerê û îradeyê nûmayişkaran teslîm bigîrê her çî kerdî. Vatî “Koxişê 36. do Apociyan rê bibo mezel”.
Bado ke nûmayişkarê 14’ê Tîrmehî badê desan rojan jû bi jû şehît kewtî dewleta zilimkar derbeya gird werd û vinî kerd. Endî peyniya polîtîkayê îxanet û teslîm girotin ame. Generalê îşkencekerdoxî zî girotxane ra remyay şî. Verikîn Kemal Pir, peycoy Xeyrî Durmuş, Akif Yılmaz û tewr peynî de Ali Çiçek ganê xo delop delop vilêşnay û şehît kewtî.
Rixmê no xoverdayişê girdî vatî; “ma deyndarê şarê xo şinê.”
Celadê ke şî koxişî û Kemal Pîr’î rê vatî; “ti veng veng mirenê” rê Kemal Pîr’î wina cewab da; “Ez veng nêmirena, serva merdimî mirena. Ez merdiş ra nêtersena”. Tarîxî zî na raştî rê şahîdey kerd. Jû roj, jew deqe zî ê nêtersiyay û poşman nêbî. Çi ke rihê înan rihê fedaîyane bi. 14’ê Tîrmeh vengdayişê ciwyana newî yo. Wesîyetê berzkerdinê tekoşîn o. No rih nika Rojawa de, Kobanê de, Şengal de rameno. Raya şoreşa Rojawa, raya serbestiya şaran û raya ciwyana newî nûmayişkaranê 14’ê Tîrmeh akerd. Nayî ra verikîn şarê Kurd û pêrokîn şarê ke raya azadî de ray şinê deyndarê nûmayişkaranê 14’ê Tîrmeh’î yê. Peynî ardişê sîstema faşîst û serdest, serkewtişê welat û înşa kerdişê sîstema demokratîk deynê no şarî yo. Wexto ke zindanê cayê zilim û îşkence werte ra hewadiyê, wexto ke pêrokîn şarî bi kamî û raştiya xo biciwyê o wext rihê nûmayişkaranê 14’ê Tîrmeh û pêrokîn şehîdan do şad bibo. Zey ke alwoz Xeyrî Durmuş’î wesîyet kerd; wayirvetişê na dawa deynê merdimîyo.” Wayirvetişê 14’ê Tîrmeh’î wayirvetişê Rojawa, wayirvetişê Kobanê, Şengal, wayirvetişê pêrokîn Kurdistan o. Vengo ke 14’ê Tîrmeh 1982’de Zindanê Homarê 5’î ra berz bi zî wina-niya bi. Ma goş bidê û goreyê wesîyetê şehîdanê xo hereket bikerê.