Bi averşîyayîşê teknolojî û makîneyan tayê meslekî vînî bîyî û tayê meslekî ver bi vînîbîyayîşî şonî. Nê meslekan ra yewe zî meslekê kulavî yo.
Meslekê kulavî ke mîyanê awa germe de bi kutiş û şidênayîşê peşmê meşnaye yeno viraştiş zî vera averşîyayîşê makîneyan de têk şî. Nika qezaya Bêrecûkî ya Riha de taxa Sancakî de bi nameyê Halîl Akyavuzo 57 serreyî nê karî keno. Babete ser o Akyavuzî qisey kerd.
Akyavuzî va ‘keyeyê ma de 6 westayê kulavî estbî û nika tena ez menda’ û wina domna: “Meslekê mi meslekêko ke merde yo; çimkî mi ra dima ti kes nêmendo ke ez nê meslekî bimusna ci.”
Zimistanî germe, hamnanî honik o
Akyavuzî va ‘kulav seba piştî, vile û romatîzmayî baş o’ û wina domna: “Kulav hamnanî honik o û zimistanî zî germ o. Labelê makînebîyayîş nê meslekî kişto. Êdî têkilîya westa û çiraxî qedîyaya. Makîneyan ra dima kar rehet bîyo û no zî beno sebeb ke no meslek biqedîyo. Nê meslekî rê eleqe nêmendo. Nika kar zî çin o û keso ke ma nê meslekî bimusnî, nêmendo. Mi ra dima do no meslek biqedîyo.”
MA/RIHA