‘Ma dê tekoşîn bikerê’
Dewijan ra Zekî Kocaman o ke dewa Xişran ra yo da zonayen ke, dewa înan 1994î de amê tolkerden û 2001î de peyser cêrîyayî dewa xo. Kocaman bado ke cêrîya dewa xo, rez, baxçe, bostanê xo newe ra resna, keyeyê rijiyayî înşa kerd. Kocaman’î vist vîrî ke dewa ke 15 serrî yo ciwiyeno reyna wazenê tol bikerê û hina dewam kerd: “5ê Gulane de seat 11.00î de sifte vengê 5-6 guleyan ame. Peycoy helîkopteranê kobra ko, kemer, birrê ke çormeyê dew de rê gulevaran kerd. Badê gulevornayen qereqolî telefon kerd û resna ke ‘qedexe’ ronîyayo. Bi şanseke gird wextê bombevornayen de kesî weşîya xo vindî nêkerd.
Zekî Kocaman’î vist vîrî ke, çimeyê xo îdarekerdişê îyenan teyna wayîrkerdişê heywanan o û qiseyê xo hina domna: “Ma qereqolî rê telefon kerd û ma va, heywanê ma estê, ma mexdûr bîyê’. Qereqolî ma rê vat: ‘Ma qariş nêbenê, eke şima goreyê ‘qedexe’ hereket nêkerê, bîyayîşan ra şima mesûlî yê. Nêzana wazenê ke ma dew ra bivejyê, ya kî çîyê bîn wazenê, ma fehm nîkerd. Eke ser ma de goçkerdişî ferz bikerê, dûştê nayî de ma dê tekoşîn bikerê. Eke goçê diyîn bibo, her çî qedîyeno.”
Mavêna gulevornayen de mend
Fatma Kocaman ke wextê êrişê eskeran de Jîyara Aşûr de bî kî nêmerdişê xo zey şanseke gird hesibna û hina va: “Ez şîya ser jîyarî û mi waşt mûm fiştra ci. Ez raştê eskeran ameya. Jû reynî de gulevornayen dest kerd ci. Mavêna gulevornayenî de menda. Mi xo eşt jew keyeyê kehan mîyan. Peycoy kî mi xo resna çê.” Kocaman vist vîrî ke lajê ay nêwesê psîkolojîk o (derûnî) û rîwalê vengê bombevornayen û êrişan nêşkeno rakewo û nêwesîya ci hona jêde bena giran. Fatma Kocaman aşkere kerd ke mesûlê herbî Reîscûmhûr Recep Tayyîp Erdogan o û seweta ke gencî nêmirê wast ke herb vindero.
Mixtarê dew Mehmet Hakki Ozdemîr’î kî vist vîrî ke, eve ‘qedexe’ ra tepya 24 seatî mexsûr mendê. Ozdemîr’î da zonayen ke wextê operasyonî de 3 çêyan (keye) de geyrayis virajîya û aşkere kerd ke, eskeran sebebê geyrayisî kî nêvat. Dewij Cîhan Şahîn ke keyeyê ci ame geyrayen da zonayen ke 6 wesayîtê zirxî amey çêyê înan, axir ra heta zereyê keye, bi seatan geyrayis kerdî.
DÎHA/DERSIM