Zelzeleyê Gexî de 100 ra vêşî keyeyan xesar dî. Erdlerzînê werdî ramenê. Nayî ra dewijî nêşkenê dekewê keyeyê xo. Dewijî ano zon ke, kesî înan rê yardim nêkerdo. Waliyê sûk zî tenya torbeyê cesedî vilayê dewijan kerd.
Qezaya Çewlig Gêxî de 3ê Kanûne de bi girdayiya 5,5 erdlerziya. Peycoy zî qeza de 300 ra vêşî zelzeleyê qijkekî-werdî bî. Dewanê Abvank, Xaror, Sîvgelik, Xûps, Oxas û xeylê dewanê bînî de 100 ra vêşî keyeyan xesarê gird dî. Xesarê tewr gird dewa Xaror de vejiya. Dew de 28 keyeyî welişyay. Taynî dewijî dew ra vejiyay, taynê ci zî şî keyeyê cîran-imbiryanan.
Şew teber de yê
Rexmê xesarê gird, dewlet heta nika yardim-alîkarî nêberd. Dewijê mexdûr rîwalê ters nêkewtê keye û şew çormeyê adirî de meydanê dew de manenê. Dewija dewa Sîvgelik Gulşen Daglayan ana ziwan ke, a bi hîrê qij-domananê xo keyeyê ke dew de xesar nêdî de manena. Ceniya bi nameyê Hedîye Gokçe zî vistvîrî ke lerziyayişê erdî gegane ramenê û aşkere kerd ke heta nika sermiyanan yardim nêkerd.
Konteynirê veng
Walitiyê Çewlig bi rojano propagandayê eşrawiyayişê 30 konteyniran keno. La hewna zî mexdûrê zelzele ra kes nê konteyniran de nîame bica kerdin. Rexmo ke dewijî bê kêye-çêye mendê, konteynirî ina veng-tol pawenê. Zewbîn zî, heta nika hetê walitî û sazgehanê dewlet mexdûran rê qe yardim nêame kerdin.
Dewijan aşkere kerd ke, roja sifte yê erdlerzin de, sermiyanî şî, tespîtê xesarî kerdî, la peycoy teba nêriştî. Dewijê dewa Xaror Ahmet Ersin vistvîrhi ke, dewa înan de xeylê keyeyî rijiyay. Ersîn’î ard ziwan ke, sermiyanê AFAD’î roja sifte yê zelzele de ameyê, la pey coy ne kes şi, ne zî kesî pers kerd. Ersîn’î vist vîrî ke erdlerzinî hona ramenê û va, rayirî zî qelêşyenê, bi na şiyayiş keyeyê ke mendî zî rijiyenê. Herzewbîn heta nika dewijan rê yardimê werdiş û erzex zî nêame kerdin.
Walî ra tenya torbeyê cesedî
Walitiyê Çewlig ke, heta nika mexdûran rê yardim nêkerd, tenya torbeyê cesedî vila kerd. Nê torbeyan mezgê dewijan de, fikrê merdiş ard vîrî. Dewijî vanê, ma terkê merdiş amey kerdin û walitî rê nêrazîbiyen damûsnay.
Çewlig û qezayê ci heremê erdlerzinan o. Rexmo ke na raştî yena zonayen, hetê sazgehanê dewlet heta nika yo tedbîr zî nêame giroten, welatijî bi merdiş ra rî bi rî viradiyay. Çewlig de 22ê Gulan 1971’î de bi qûwetê 6.8 erdlerziya û netîce de 878 welatijan weşiya xo kerd vinî. 700 ra vêşî kes bî dirbetin.
Herzewbîn 1’ê Gulan 2003’î de zî, bi qûwetê 6,4 erdlerziya û netîce de 176 welatijan weşiya xo kerdî vinî. Erdlerzinê ke nika dewam kenê zî, ronişteyan de, tersê merdiş akenê.
DÎHA/ÇEWLIG