Çend rojî verê teyarayanê dewleta tirkî Kortekê Başûrê Kurdîstanî de çend dewî hedef girewtbî û ewja de 3 sîvîlî merdbî û 5 sîvîlî birîndar bîbî. Vera qetlîyamê dewleta tirkî de her ke şono reaksîyonî zêde benî. Nê reaksîyonan ra yewe zî Kampa Şehîd Rustem Cûdîyî ya Mexmûrî de ame.
Bi seyan kesî Dezgehê Keyeyanê Şehîdanî de ameyî têhet û bi eşkerayîyêka çapamenîye vera qirkerdişê dewleta Tirkî yê Kortekî de hêrsê ard ziwan. Eşkerayîye de ame vatene ke bi hêrişê vera Başûrê Kurdistanî de yeno waştene ke heme leteyê Kurdistanî bêrê bindestkerdene û şarê Kurdî ra ame waştene ke wa vera naye de bêveg nêmano.
Hêrişê qirkerdişî yê vera Başûrê Kurdistanî û Efrînî yê dewleta Tirkî bajarê Hamburgî yê Almanya de zî ameyî şermezarkerdene. Bajarê Stade ra zî xeylî kesî tewrê çalakîye bîyî. Çalakîye de bi pankart û vilawekan bale ameye antene serê hêrişanê dewleta Tirkî yê vera Kurdan û bi siloganê ‘Merkele fînanse kena, Erdogan bombardûman keno’ hetkarîya hukmatê Almanya zî ameye şermezarkerdene.
AMED