AKP ya kî vajeme jû mordemek, çik ke destabera xo ame kenê. Aştiye nêwazene, qeyta nêwazene ke kes tey qalê însoniye bikero. Her hetan ra erzenê şarê kurdî ser, dûste nayê de kî şar erzeno xover.
Hama mezelanê domananê kurdan riznayene Saraya înan riznayena nêzonene.
Mezelê sembolê serbestiye, mezelê sembolê kamayisî, mezelê ray û roştî. İ mezelan de çeney û lazê kurdan estê. İ mezelan de ciwanî, vilîke mayan û piyan estê. İ mezelan de bedelê rozanê ewroyîn estê.
Coka iyê ke erzenê mezelan, erzenê rûmetanê şarî ser, bizone ke dem çaraxîno, hersê şar beno laser, en peyniye de kî a Saraya ke serva ci herb kenê inan sero riznene.
Gûnê na sîsteme bin ra bero vurnayene. E ke hîn mebo, zîhniyetê dewlete her tim verra kurdan eyniyo.
Kam çî waxt kewte tengê, desinde çeteyanê xo, ya kî namê virena vajîme JÎTEMa xo kena dewre. Xora hefteyanê pêyenan de ma kî niyada vîneme ke tewa nêvuriyo. Serranê 80’î de dewlete çitur bî ewro kî hîna, serranê 90’î de çitur bî ewro ki hîna.
Kam çî hukimat bêro raya xo zelal a: qetlîam e. Naca de mavênê hukimatanê verênan û AKP de ferq çîno. Erdogan û AKP kî na polîtîka jedena kerdê xorî, xo ra qeyir kes nas nêkene, kes nêwazene, kam kî dûste înan de fekê xo kerd ra, hedefê înan de ro. AKP teyna bêvengiye wazena. Wayirê nî zîhniyete, wela kurdan ra hata kultir û tarîxê ci talan kenê, asîmîle kenê.
Dûste na zîhniyetê kolonyalîstî de idareyê xoser ra qeyir raye ke çîna. Hem serva ameyena serbest, hem kî serva pawitena asteyanê ciwanan.
Zîhniyetê ke merdonê ma mezele de rehet nêverdana verva ayê veng jedena berz bivejiyo. Verva ayê weşiya de pake teyna bi xoseriya şaran a bena. Xora qalê îtîqatan ke nêkeme, endî kes nêmendo ke mezono dewlete û AKP îtîqatane bînan rê çitur nejdî benê.
Cemxaneye riznayî, no kî sifte virene nêbî, e ke elewî na seate ra tepiya lewe nî zilmkaran de vinete, reyê xo bicarne peyê xo de niya de rê, asteyê maye û piyanê ci zon danê.
Vernîya pêro nî kerdenan teyna têhet ameyena şaran û îtîqatan, her ca de îdareyê xoser ronayene û verva Dehaqan xoverdayena yena guretene.
Meral KUÇUK